Naaja Nathanielsen: Ajornartorsiutip qitera saassuttariaqarparput

Inatsisartuni ilaasortap aaqqissuusseqqinnerit piviusunngortinneqarnissaannut suliniutit piaartumik aallartisarneqartariaqarsorai.

Ukiup tullianut aningaasaqarnermut inatsisissatut siunnersuutip, ukiunilu tulliuttuni pilersaarutit amigartooruteqarfiunissaat aarleqqutigai.

- Pilersaarutaasumik amigartooruteqartartugut tikkuarpaat. Tassa oqaqattaaginnavippugut, maannakkorpiaq amigartooruteqarpugut, kisianni takussavarsi: Ukialuit qaangiuppata sinneqartooruteqassaagut. Ukiulli taakkua suli takkutinngillat. Amigartoorutit allisikkiartuinnarigut takusinnaavarput, Naaja Nathanielsen oqarpoq.

Aaqqissuusseqinnissamut siunnersuutigineqartut naammanngillat

Aaqqissuusseqqinnissamik siunnersuutigineqartut aningaasaqarnikkut aaqqissuussaanikkullu ajornartorsiutinik tamakkiisumik aaqqiissutaassanngitsut nunattali aningaasaqarnikkut ajornartorsiutai amigartooruteqarnissamik naatsorsuuteqarnikkut akileraartarnikkullu akitsuusersuinikkullu aaqqiissuteqarfiginiarsarineri ataavartumik aaqqiissutaanavianngitsoq isumaqarpoq.

Inuit Ataqatigiinniillu Naalakkersuisut aaqqissuusseqqinnissamut eqqartueqatisileraat.

- Ajornartorsiutip qitera saassuttariaqarparput. Aningaasaliissutit ataasiakkaatigut iliuuseqaqattarunnaarluta, aningaasanut inatsit tamakiisumik isigisariaqarparput. Tassalu politikkikkut tunngaviusumik oqallinnissaq pisariaqarpoq.   Taamaammat partiit tamattaalluta aaqqiissutissarsiorluta oqallinnissatsinnut Naalakkersuisut aggersaanissaannik kaammattorpagut, Inatsisartunut ilaasortaq oqarpoq.

Aatsitassarsiorneq aallartisarneqartariaqarpoq

Aningaasaqarnermut Siunnersuisoqatigiit aamma oqariartuutigaat aatsitassarsiornermut suliniutit aallartisarneqartariaqartut, nunatsinnut siuariartortitseqataaqqullugit.

Naaja Nathanielsenip naqissuserpaa Inuit Ataqatigiit tamanna isumaqatigigaat. Nunatsinnili uranimik piiaanissaq annertuumik akerleralugu.

- Aatsisattassarsiorneq aallartittariaqarpoq. Aatsitassarsiorfeeqqallu marluk aallartisarneqarmata nuannaarutigaarput, neriuppugullu suli amerlanerusut ukiuni tulliuttuni aallarnisarneqassasut, Naaja Nathanielsen oqarpoq.

Aningaasaqanermut siunnersuisoqatigiit nalunaarutimik arfinilissaat saqqummiuppaat. Naaja Nathanielsenilu isumaqarpoq siunnersuutigineqartut politikkerinit atorneqanngippallaartut.

- Nalunaarusiami inissiaqarnermik sammisaqarfiusumi assigiinngitsunik inassuteqarput, taakkuali Naalakkersuisunit akerliusumik iliuuseqarput, aningaasanillu inatsisissatut siunnersuut oqaluuserineqarmat, Aningaasaqarnermut Siunnersuisoqatigiit inassutaat ineqarnermut tunngasut Naalakkersuisuutitaqartut tapersernagit oqaatigaat. Taamaammat inassutaat atunngippallaaqaagut, Naaja Nathanielsen oqarpoq.