Maleruagassalioqqinnermi Qeqertarsuup Tunuani aalisartut qaleralinniaqqissinnaalerput
Qeqertarsuup Tunuani umiatsiaararsortut qaleralinniaqqissinnaalerput.
Februaarimi pisassiissutit sipporlugit aalisartoqarpallaarsimanerata kingunerisaanik aalisagartassiissutit nungunneqarmata martsip arfineq aappaani qaleralinniarneq matuneqarpoq. Pilersaarutit malillugit apriilip arfernata tungaanut aalisagartassiissutit unitsinneqarlutik.
Qeqertarsuup Tunuata imartaani 100 tonsinik februaarip qaammataani qaleralinniartoqarpallaarsimavoq.
AAMMA ATUARUK Flekskvoter skal forhindre forhøjelser af hellefiskekvoter
Qaammat martsi eqqarsaatigalugu tamanna aaqqiissutigineqarallarpoq. Siorna 225 tonsit decemberimi, novemberimi oktoberimilu pisassiissutaagaluartut martsimut nuunneqarnissaanik Aalisarnermut naalakkersuisoqarfik partiillu aalajangermata.
Massakkut Inatsisartuujunnaalersuni partiit siulittaasuiniit pisassiissutit nuuneqarnissaanik akuersisut, Aalisarnermut naalakkersuisoqarfimmiit oqaatigineqarpoq. Inatsisartunut immikkut ittumik qinersinissamut aalajangiisoqarmat, partiini siulittaasut inuiaqatigiinnut tunngasunik aalajangiisuugallarnissaat Naalakkersuisunit Inatsisartuniillu aalajangerneqarpoq.
Qineqqusaarnerummi nalaanni Inatsisartut Naalakkersuisullu aalajangiisinnaanerat killeqarpoq.
Taamaamallu umiatsiaararsortut qaammat martsimi 225 tonsinik qaleralittassinneqarput.
Taama aalisarnermut naalakkersuisoqarfik KNR-imut oqarpoq.
Ileqqutaat
Qeqertarsuup Tunuani, Uummannami Upernavimmilu pisassiissutit (TAC, aaqq.) tamakkiisut ukiuni kingullerni ilaqqinneqartuarneri nalinginnaasunngornikuuvoq.
Aalisagartassiissutit tamakkiisumik qaqinneqarsimatillugit, taakkunanngalu amerlaliinissamik pinngitsoortitsisinnaasumik, aalisarnermut nalunaarutinik ukioq kingulleq decemberimi Naalakkersuisut allanngortitsipput.
AAMMA ATUARUK Fiskeridepartementet vil rykke kvoter efter overfiskeri i Diskobugten
Aalisarnermut malittarisassat nutarterneqanngikkallarmata, aqutsinikkut aalajangersakkat malillugit angallatit meterinit arfinilinnit sinnerlugit atsigisunut pisassiissuteqartoqartarpoq, meterinilli arfinilinnit minnerusunik umiatsiaararsortut paggatassiissutinik aalisartarput. Tassanilu aalisartuni ataasiakkaani qanoq annertutigikkuutaartumik aalisarsinnaanissaanik killilersuisoqanngilaq.
Aalisakkat pilerngunneqartut
Aalisartut akornanni aalisakkanik pilerngunnermik kinguneqakkajuppoq, taannalu ukiup naalernerani aalisagartassiissutit nungunneqarnerannik kinguneqartarpoq. Aalisagartassiissutit aalisarneqareeraangata, aalisartut aalisarsinnaaniassammata pisassiissutigineqartut TAC-imik taaneqartartut amerlineqaqqittarput. Taamatullu pisoqartuaannarpoq.
Angallatit meterinik arfinilinnik atsigisut pisassaatitik ukiumi aalisarfiusumi pisarinngitsuukkatik, ukiup tullianut juunip naanerata tungaanut aalisarsinnaajumallugit nuutsittarpaat. Juunilli naanerani pisassaraluit tamakkerlutik pisarineqanngitsoortarput.
Pisassiissutinili aalisarneqanngitoortut umiatsiaararsortunut juulip aallaqqaataata kingorna aalisattassiissutigineqarsinnaalersut Naalakkersuisut nalunaarutaanik allanngortitsinerup kinguneraa.
Angallatinut meterinik arfinilinnik takinerusunut pisassiissutinik nuutitsineq, Naalakkersuisut nalunaarutaa allanngortinneqanngikkallarmat, inatsisinik unioqqutitsineruvoq.