Qaleralittassat sipporneqareertut naalakkersuisoqarfik pisasseerusuttoq
Qaleralinnik tunisisinnaaneq sapaatiuppat matuneqassasoq Namminersorlutik Oqartussat allapput. Ukiumoortumik pisassat qaffanneqarsinnaanngitsut qaammatiniilli allaniit pisassanik nuussisoqarnissaa misissorneqartoq Naalakkersuisoqarfiup pisortaa, Jørgen Isak Olsen, KNR-imut ilisimatitsivoq.
- Ukiumoortumik pisassat ilaqqissanngillat. Qaammatinit allanit pisassanik nuussinissarput maana misissorparput. Ilimanarporlu oktobarimi, novembarimi decembarimilu pisassaniit marsimut nuussisinnaassasugut, Jørgen Isak Olsen KNR-imut oqarpoq.
Qaqugu aalajangiisuusumik isummissanerlutk taassuma oqaatigisinnaanngilaa.
Qeqertarsuup Tunuani oktoberimi, novembarimi decembarimilu pisassat qaammatini tamani 214 tonsiupput. Taakkunannga 100 tonsinik marsi qaammammut nuussinissaq ilimanartoq sulissutigineqartorlu naalakkersuisoqarfimmi pisortaq oqarpoq.
Februaarimi sippuisut
Qeqertarsuup Tunuani sinerissap qanittuani qaleralinniat 47-imik naanilimmik akuersissutaatillit, januaarimi 214 tonsit pisassaraat taakkunannga 115 tonsiinnaat qaqikkamikkit pisassat sinneruttut 99 tonsit februaarimut nuunneqarput.
Taamaalilluni aalisartut februaarimi qaleralittarisinnaasaat 214 tonsiunatik 313 tonsit missaanniilerput. Taakkuali sipporlugit 422 tonsit februaarimi qaqippaat.
Sippuineq marsimi tunngaviusumik pisassat 214 tonsiusut 105 tonsiinnanngornerannik kinguneqartoq, Jørgen Isak Olsen KNR-imut oqarpoq.
AAMMA ATUARUK Aalisarnermi sukaterineq: Aalisartut kattuffiat aappaagumut ernumasoq
Qinersisoqartussaanera peqqutaalluni Naalakkersuisut pisassanik ukiumut pisassiissutaasunik qaffaanissaminnut periarfissaqanngillat, taamaattoq ukiumi matumani qaammatikkaartumik pisassaareersut ilaat qaammatinut allanut naalakkersuisoqarfimmiit nuunneqarsinnaasut, Jørgen Isak Olsen oqarpoq.
