Aalisarnermi sukaterineq: Aalisartut kattuffiat aappaagumut ernumasoq
Qaleralinniarfinnik pisassiivinngortsitsinermi umiatsiaararsorlutik qaleralinniat ullumikkornit suli eqiterunnerulernissaat Sinerissap Qanittuani Aalisartut Piniartullu Kattuffiata ernummatigaa.
Qaleralinniarnermi pisassiiviunngitsunik aalisarfeqarnera Naalakkersuisut atorunnaarsippaat. Tamanna aalisartut kattuffiata, KNAPK-p, taperserpaa.
AAMMA ATUARUK Naalakkersusiut qaleralinniarfiit aqutsiviunngitsut atorunnaarsikkaat
Sinerissamulli qanittumi aalisartut katuffiata allap, SQAPK-p, aalajangerneq akerleraa.
Qaleralittassiissutit, qaammatikkaartumik agguagaasut, ilaatigut qaammat qiteqqutinngitsorluunniit aalisarneqareertartut, SQAPK-miit misilittagaraat.
Killilersugaanngitsumik qaleralinniarnissamut periarfissaasimasup atorunnaarsinneqarneratigut, qaleralittassat suli sukkanerusumik qaqinneqartalernissaat kattuffiup aamma ernummatigaa.
- 2021-imi aalisarnerup ingerlanissaa ernumanarsereerpoq, SQAPK-p pisortaa Erik Lange KNR-imut oqarpoq.
Najugaqarfinnut allanut nutsertut
Taassuma qaleralinniat najugaqarfinnut akigissaarnerusunut tunitsivilinnut nutsernissaat ilimagaa. Soorlu ullumikkut qaleralinniarpassuit Qeqertarsuup Tunuanut Uummannallu eqqaanut katersuussimasut.
- Sineriammi tamakkerlugu qaleralinniat suli ullumikkornit katersuunnerulernissaannik kinguneqartussaassaaq, Erik Lange oqarpoq.
AAMMA ATUARUK Uummannamut qaleralittasseeqqittut: Innersuussutaasunit 73 procentimik amerlanerusut
Taamaammat 6 meterimit naannerusunik umiatsiaararsorlutik qaleralinniat ataasiakkaarlugit pisassaqartilernissaat, taassuma noqqaassutigaa. Taamaalillutik paggannatik inuussutissarsiorsinaaniassammata.
- Aalisarnerup eqqissisimanerusumik ingerlanissaa eqqarsaatigalugu aalisartut pisassalersornissaat tuaviuunneqartariaqarpoq, Erik Lange oqarpoq.
KNAPK-p aqutsinerulerneq akuersaarpaa. Qaleralinniartut saarulliit takkusimaaneranni taakkunannga aalisartarnissaat aamma kaammattuutigalugu.