Naalakkersusiut qaleralinniarfiit aqutsiviunngitsut atorunnaarsikkaat
Sinerissap qanittuani qaleralinniarfiit pisassiiviunngitsut oqaluttuaannanngorput. Naalakkersuisut taama tusagassiorfinnut allapput. Namminersorlutik Oqartussat nalunaarutaat taamaalilluni ullumikkut allanngortinneqarpoq.
Tamanna Naalakkersuisut pisassiiviunngitsunik aalisartitsinerisa atorunnaarneranik kinguneqarpoq. Pisassiivinngortut qaleralittassaat aalajangerneqarput.
Aqutsiveqarfioreersuni Upernavimmi, Uummannami, Qeqertarsuullu Tunuani pisassat allannguuteqarpallaanngitsut, Naalakkersuisut allapput.
- Aqutsiveqarfiup Qeqertarsuup Tunuata kujammut killinga kujasinnerulaartumut 68°51’N-miit 68°30’N-mut inissinneqassaaq.
AAMMA ATUARUK Naalakkersuisoq fastholder: Kvotefrie zoner for hellefisk skal afskaffes
Aalisarnermut naalakkersuisoq, Jens Immanuelsen, sinerissap qanittuani pisassiiviunngitsunik qaleralinniarneq Naalakkersuisoqatigiit isumaqatigiissutaat malillugu atorunnaassasoq KNR-imut oktoberimi oqarpoq.
Tamannalu tusagassiutinut nalunaarummi aamma allaqqavoq.
Aqutsiveqarfinngortut tallimat:
Aqutsiveqarfik Qaanaaq
Aqutsiveqarfik Sisimiut-Maniitsoq
Aqutsiveqarfik Nuuk
Aqutsiveqarfik Paamiut-Qaqortoq
Aqutsiveqarfik: Tunu
Tusarfik: Naalakkersuisut
- Nunatta sineriaa tamarmi aalisarnikkut aqutsiveqarfinnut immikkoortiterneqassaaq, tassanilu sapinngisamik aalisakkat amerlanerpaat pillugit pisassiisoqartassalluni. Uumassusilinnik siunnersuisartut pisassat annertussusaannik innersuussuteqartassapput, tassanilu aqutsiviit nutaat ilanngullugit siunnersuisoqartassaaq.
Pisassiiviunngitsut atorunnaarput
Tassalu sumiiffiit pisassiiviunngitsutut taaneqartartut, aqutsiveqarfik Upernavimmi, Uummannami Qeqertarsuullu Tunuani pisassiiviulerput.
- Sumiiffiit ilaasa pisassiiviginagit killeqanngitsumik aalisarfigineqartarneri akisussaassuseqarnermut nungusaataanngitsumillu aalisarnermut naapertuutinngillat. Naalakkersuisut allapput.
- Inuussutissarsiortut kissaatigaat sinerissap qanittuani qaleralinniarneq siunissami MSC-mik meqqilersorneqassasoq, tamannalu sumiiffinni pisassiivigineqanngitsuni aalisarneq akuerineqartillugu MSC-mik meqqilersuititsiniarneq ajornakusuussaaq. Naalakkersuisut nangillutik taama allapput.
Aqutsiveqarfiunngitsuni killeqanngitsumik maannamut aalisartoqarsinnaavoq. Aqutsiveqarfinni Upernavimmi, Uummannami Qeqertarsuullu Tunuani qanoq aalisartoqartigissanersoq Naalakkersuisut siunissami aalajangersortalissavaat.
Aappaagumut pisassat
Aalisarnermut naalakkersuisoq Jens Immanuelsen aqutsiveqarfinngortitsinermi qaleralittaaasartut ikilissanngitsut oktobarimi neriorsuivoq.
- Aqutsiviunngitsuni qalluinerit qanoq inissisimanersut ilisimaneqareerpoq. Sapinngisamik taakku tunngavigalugit pisassiissutit amerlanerpaaffissalerlugit siullertut orninniarneqarpoq, Jens Immanuelsen KNR-imut oktobarimi oqarpoq.
Aqutsiveqarfinnut TAC:
Sisimiut-Maniitsoq: 223 tonsit
Nuuk: 1.039 tonsit
Paamiut-Qaqortoq: 618 tonsit
Qaanaaq: 500 tonsit
Tunu: Pisassiisoqanngilaq.
Tusarfik: Naalakkersuisut
Tassalu Naalakkersuisut aappaagumut TAC tassa pisassat qanoq oqimaatsigissanersut maanna aalajangerpaat. Sinerissap qanittuani qaleralinniarfittut aqutsiveqarfinngortuni Sisimiut-Maniitsoq, Nuuk, Paamiut-Qaqortoq aammalu Qaanaamut 2.131 tonsit pisassiissutaapput.
Naalakkersuisut aappaagumut pisassiinerminni 2017-imiit 2019-imut pisaasartut oqimaassusaasa agguaqatigiisinnerat najoqqutarigaat, Naalakkersuisut tusagassiutinut allapput.
- Qularnaatsumik nungusaataanngitsumik aalisarnissaq aningaasarsiornissarlu qulakkeerniarlugu MSC-millu meqqilersuititsinissaq siunertaralugu, Naalakkersuisut aalajangerput, aalisarneq 2021-mi ilisimatitsissutigineqassasoq 2022-mit aalisarneq nalimmassarneqalissammat, NAFO-p ilisimatuussutsikkut siunnersuineranut, nungusaataanngitsumik aalisarnermut naleqqussarneqassalluni.