Naalakkersuisoq naqissusiisoq: Qaleralinniarfiit pisassiiviunngitsut atorunnaassapput
Sinerissap qanittuani qaleralinniarfiit pisassiiviunngitsut ukiortaamiit atorunnaartussanngorput. Tamanna aalisarnermut naalakkersuisup Siumumeersup, Jens Immanuelsenip naqissuserpaa.
- Naalakkersuisoqatigiinnissamik isumaqatigiissut malillugu sinerissap qanittuani qaleralinniarfiit tamarmik aqutsivinngortinneqarnissaat isumaqatigiissutaavoq. Taavalu aappaattut kitaata avataani qaleralinniarnerup MSC-lersungaanerata sinerissap qanittuani qaleralinniarfiit aqutsivinngortinneqassasut piumasaqaatitarisimavaa. Tassa tunngavik, Aalisarnermut naalakkersuisoq, Jens Immanuelsen KNR-imut oqarpoq.
AAMMA ATUARUK Aqutsiveqarfinngortitsiniarneq naalakkersuisuutitaqartut isumaqatigiinngissutigaat
Naalakkersuisut sinerissap qanittuani qaleralinniarfinnik aqutsiveqarfinngortitsiniarnerat nalakkersuisoqatigiit partiivisa assigiinngitsunik isumaqarfigaat. Siumup pisassiissutaalerumaartussat maanna aalisarneqartartunit ikinnerussanngitsut piumasaraat. Aamma aalisarnermut ataatsimiititaliarsuup isumaliutissiissutissaa utaqqimaaqqaarumavaat. Aalisarnermut ataatsimiititaliarsuaq siunissami aalisarnerup qanoq inissaa pillugu maannakkut sulivoq. Sulinerat aappaagu februaarip naanerani naammassissaaq.
Nunatta Qitornai aamma pisassiissutaalertussanik ikileeqqusinngillat.
Demokraatilli Naalakkersuisut anguniagaannut tamakkiisumik tapersiipput.
AAMMA ATUARUK Kruse: MSC-p nunarput aqussanngilaa
Aalisarnermut naalakkersuisoq aqutsiveqarfinngortitsinermi qaleralittaaasartut ikilissanngitsut neriorsuivoq.
- Aqutsiviunngitsuni qalluinerit qanoq inissisimanersut ilisimaneqareerpoq. Sapinngisamik taakku tunngavigalugit pisassiissutit amerlanerpaaffissalerlugit siullertut orninniarneqarpoq, Jens Immanuelsen oqarpoq.
Sinerissap qanittuani ukioq mannamut qaleralittassatut pisassiissutissatut siunnersuutit 16.000 tonsipput, 26.000 tonsillu pisassiissutaallutik.
Pisassiissutit qaammat tulleq tusarniutaanissaat taassuma naatsorsuutigaa.
Naalakkersuisut aqutsiveqarfiit qanoq agguataarniarneraat assimi takuneqarsinnaavoq.