MSC-mik inuiaat siorasaaginnarlugit uffa akerlianik pisuussutit isumannanngitsut taanna ajorneruvoq, Siumup Inatsisartuni gruppiani politikkikkut oqaaseqartartoq, Karl Kristian Kruse oqarpoq.Assi: KNR

Kruse: MSC-p nunarput aqussanngilaa

Siumup Inatsisartuni gruppia Naalakkersuisut ukiortaamiit aqutsiveqarfinngortitsiniarnerannut isumaqataanngilaq. Taakkua aalisarnermut inatsit utaqqeqqaarusuppaat.

Siumup Inatsisartuni gruppiata Naalakkersuisut ukiortaamiit aqutsiveqarfinngortitserusunnerat siusippallaarnerarpaa.

- Aalisarnermut inatsit siulliulluni suliarineqassasoq, taassumalu kingorna sinerissap qanittuani aalisarneq pillugu nalunaarutitigut nutarterinerit ingerlassapput, Siumup politikkikkut oqaaseqartartua, Karl Kristian Kruse KNR-mut oqarpoq.

AAMMA ATUARUK Qaleralinniarfiit ukioq nutaamiit aqutsiveqarfinngussasut

Siumup gruppiata aalisarnermut naalakkersuisoq ataatsimeeqatiserisimavaa, ullunilu qaninnerni naalakkersuisumik ataatsimeeqateqarnissaq naatsorsuutigalugu.

- Qularnaarusutarput pingaarneq tassaavoq: Aqutsiveqarfiunngitsut aqutsiveqarfinngortinneqarpata, qanoq annertutigisumik pisassiisoqarniarpa?, Karl Kristian Kruse oqarpoq nangillunilu:

- Annertuumik malunnaatilimmillu qaffaasoqanngippat aqutsiveqarfiliorneq aalisartut aalisaannarsinnaanerannut annertuumik innarliisussaavoq, Karl Kristian Kruse oqarpoq.

Naalakkersuisoqatigiit partiivi akerleriittut

Aamma naalakkersuisoqatigiit partiivisa allat Demokraatit Nunatta Qitornaasalu aqutsiveqarfinngortitsiniarnerit assigiinngitsunik siusinnerusukkut isummerfigaat.

Demokraatit aappaagumit aqutsiveqarfinngortitsiniarneq tamakkiisumik tapersersorpaat. Nunatta Qitornaaniilli allamik isumaqarput. Aqutsiveqarfiit allanngortinneqassappata pisasseeriaaseq pinngitsoorani allanngortittariaqartoq oqarput.

Kruse: Inuiaat siorasaarnagit

Avataasiorluni nunatta kitaani qaleralinniarneq MSC-mik meqqeqarpoq. MSC-millu meqqeqaannassaguni sinerissap qanittuani qaleralinniarfiit aqutsiveqarfinngornissaat piumasaqaataavoq. Kruseli MCS pillugu aqutsiveqarfinngortitsisoqartariaqanngitsoq isumaqarpoq.

AAMMA ATUARUK Aqutsiveqarfinngortitsiniarneq naalakkersuisuutitaqartut isumaqatigiinngissutigaat

- MSC-mik inuiaat siorasaaginnarlugit uffa akerlianik pisuussutit isumannanngitsut taanna ajorneruvoq. Aamma MSC-p nunarput aqussanngilaa, Karl Kristian Kruse oqarpoq.

Naalakkersuisut aqutsiveqarfiit qanoq agguataarniarneraat assimi takuneqarsinnaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat