Naalakkersuisut qaleralittassanik qaffaasarunnaarniarlutik iliuuseqartut
Angallatit umiatsiaaqqallu aqutsiveqarfinni Qeqertarsuup Tunuani, Uummannap eqqaani Upernaviullu eqqaani sinerissap qanittuani qaleralinniat ukiumut pisassaat tamakkiisoq TAC, ukiuni kingullerni qaffanneqartuartarpoq.
Tamannali Namminersorlutik Oqartussat nalunaarutaata allanngortinneratigut pinaveersaartinneqalertoq, Aalisarnermut naalakkersuisoq, Jens Immanuelsen KNR-mut oqarpoq.
AAMMA ATUARUK Qeqertarsuup Tunuani qaleralinniartoqaqqissinnaanngortoq
Nalunaarut ullutsinnut naleqqussarneqartariaqartoq, Naalakkersuisut isumaqarput, Jens Immanuelsenilu siornamut pissutsinut assersuuteqarpoq.
- 2019-imi ukiup naanerani 7100 tonsit missaat qaqinneqanngitsoorput, ukiup tullianut nuuneqarput, kisiannili ukiup tulliani ukiup affaani aalisarfissarititaasoq qaangiummat 2900 tonsit missaat qaqinneqarput, sinneqarlutillu 4000 tonsi sinnilaarlugu, taamaalilluni TAC tamakkerluni qaqinneqangilaq, Jens Immanuelsen KNR-imut oqarpoq.
Tassami aqutsiveqarfinni taakkunani 6 meterimit takinerusumik angallataatillit namminneq pisassaateqartarput. Umiatsiaaqqallu 6 meterimit naannerusut paggallutik aalisartarlutik.
Paggatullu taakkua pisassaminnik ukiup naajartulernerani nunguutsisartut tusagassiuutini tusarsaasarput. Nunguutsisarnerallu TAC qaffanngikkaluarlugu iliuuseqarfigineqalerpoq.
Juulip aallaqqaataaniit nuunneqarsinnaalertut
Tassami angallatit 6 meterimik takinerusut pisassaatitik ukiumi aalisarfiusumi pisarinngitsuukkatik ukiup tullianut juunip naanerata tungaanut aalisarsinnaajumallugit nuutsittarpaat, juunilli naanerani suli tamakkerlugit aalisarneq ajorpaat. Taamaalillunilu pisassaraluit tamakkerlutik pisarineqanngitsoortartut, naalakkersuisoq nassuiaavoq.
Pisarineqanngitsoortullu taakkua umiatsiaararsortunut juulip aallaqqaataaniit nuunneqarsinnaalerput.
Nalunaarut decembarip 17-ani akuerineqarpoq.
AAMMA ATUARUK Uummannamut qaleralittasseeqqittut: Innersuussutaasunit 73 procentimik amerlanerusut
Nalunaarut allanngortinneqanngikkallarmat 6 meterimit takinerusumit pisassaatillit pisassaat umiatsiaararsortunut nuunneqarnissaat inerteqqutaavoq.
