Myanmarip Tuluit Nunaanni aallartitaa Londonimi aallartitaqarfimmit anisitaasoq
Myanmarip Tuluit Nunaanni aallartitaa Londinimi aallartitaqarfimmit anisitaasimalluni pingasunngornermi oqarpoq.
- Aallartitaqarfimmit anisitaavunga, aallartitaq Kyaw Zwar Minn nutaarsiassaqartitsivimmut Reutersimut Myanmarip Londonip qeqqani aallartitaqarfiata silataani oqarpoq.
- Londonip qeqqani uppisitsinertut taaneqarsinnnavoq. Illu allaffeqarfigisara tiguarsimagaat takusinnaavarsi, taanna oqarpoq tuluillu nunanut allanut tunngasunut ministereqarfiannut attaveqarluni ilanngullugu oqaatigalugu.
Tusarfiit oqarnerat naapertorlugu, aallartitaq iseqqusaajunnaartillugu Myanmarip tuluit nunaanni aallartitaata tullersortaata matu parnaarsimavaa, Myanmarimilu sakkutuut sinnerlugit aallartitaqarfik nakkutigilersimallugu.
AAMMA ATUARUK Myanmarimi sakkutuut naalakkersuisunik uppisitsineraniilli inuit toqutaasut 300-t sinneraat
Myanmarimi sakkutuut februaarip aallaqqaataani pissaanermik tigusinerat aallartitap isumaqatiginagu oqarnerata kingorna taama pisoqarpoq.
Taamanikkulli nunami tassani akerliussutsimik takutitsisut arlaqartut sakkutuuninngaaniit peqqarniitsumik toqutaapput.
Sakkutuut iliuusaat aallartitap Kyaw Zwar Minnip akuerisinnaannginnerarpai, Aung San Suu Kyilu iperagaanissaanik kaammattuisuulluni.