Myanmarimi sakkutuut naalakkersuisunik uppisitsineraniilli inuit toqutaasut 300-t sinneraat
Myanmarimi sakkutuut nunami tassani naalakkersuisunik februaarip aallaqqaataani uppitsitsimmatali inuit eqqissiviilliornerni toqutaasut 300-nit amerlanerupput.
Isummaminnik ilungersuussallit tamaanilu tusagassiorfiit arlallit kisitsisaataasa tamanna takutikkaa, nutaarsiassaqartitsivik Ritzau allappoq.
Inuit 275-init ikinnerunngitsut Myanmarimi sakkutuunit maannamut toqutaasimasut, ilungersuussisut Assistance Association for Political Prisonersimeersut (AAPP) sapaatit-akunnerani uani ilisimatitsissutigaat.
AAMMA ATUARUK FN: Myanmarimi inuit 38-t eqqissiviilliortoqarnerani toqutaasut
Toqutaasimasulli 320-nngorsimasut, AAPP sisamanngornermi ilisimatitsivoq.
Myanmarimi sakkutuut tamat oqartussaaqataanerat naapertorlugu qinigaq naalakkersuinikkullu siuttoq, Aung San Suu Kyi, ukioq manna februaarip aallaqqaataani uppisillugulu pissaanermik tigusisunut akerliussutsiminnik takutitsisut sakkortuuliorfigaat.
