FN: Myanmarimi inuit 38-t eqqissiviilliortoqarnerani toqutaasut
Myanmarimi ippassaq pingasunngornermi eqqissiviilliortoqangaatsiarmat inuit 38-t toqutaapput. Myanmarimi sakkutuut pissaanermik qaammatip ataatsip matuma siornatigut tiguaapput.
Naalagaaffiit Peqatigiit nunamut taassumunnga aallartitaat Christine Schraner Burgener taama oqarpoq.
- Naalakkersuisut februaarip aallaqqaataani uppisinneqarmatali, aammik ullumi ulloq aatsaat taama kuutsitsiffiutigaaq. Inuit 38-t ullumi toqutaapput, naalakkersuisullu uppisinneqarmatali katillugit katillutik 50-init ikinnerunngitsut maannamut toqutaasimallutik. Amerlanerillu aqqunartitersimapput, Burgener attaveqaatit aqqutigalugit apersorneqarnermini ilaatigut oqarpoq.
Myanmarimi sakkutuut, tamat oqartussaaqataanerat aallaavigalugu qinigaq Myanmarimilu naalakkersuinikkut siuttoq, Aung San Suu Kyi, februaarip aallaqqaataani uppisippaat. Taanna taassumalu Den Nationale Liga for Demokratimi (NLD) parteeqataata ilarpaalui tigusarineqarput.
AAMMA ATUARUK USA-p Myanmarimi sakkutuut pillarlugillu assinganik iliuuseqarnissamik sioorasaaraat
Myanmarimi akerliussutsimik kingorna takutitsinersuaqaqattaarpoq. Asiap kujammut kangisissuani nunami tassani sakkutuut pissaanertik taassuma saniatigut sakkortunerulersikkiartorpaat.
- Assilisat isumakulunnartut ullumi takuakka. Peqqinnissaqarfimmi nammineq kajumissutsiminnik sulisut politiinit tassani persuttarneqarput, peqqinnissaqarfimmilu sulisut sakkulisanngillat.
Myanmarimi sakkutuut pissaanermik tiguaanerisa nunanit tamalaanit unitsinneqalertorrnissaat, Myanmarip Naalagaaffiit Peqatigiinni aallartitaata Kyaw Moe Tunip sapaatit akunnerata naanerani kaammattuutigaa.
Kyaw Moe Tun tamanna pillugu nalunaaquttap akunneri 24-t qaangiutinngitsulluunniit soraarsitaavoq.