USA-p Myanmarimi sakkutuut pillarlugillu assinganik iliuuseqarnissamik sioorasaaraat
USA-p Myanmarimi sakkutuut aqutsisui marluk akerliussutsimik takutitsisunut peqqarniisaaginnarniarpata immikkut iliuuseqarfiginiarpai.
USA-p nunanut allanut tunngasunut ministeria, Antony Blinken, ataasinngornermi taama oqarpoq.
USA nunani Myanmarimi sakkutuut naalakkersuisunik uppisitsinerannut immikkut ittumik sukannersumillu iliuuseqaqqaartuuvoq.
EU-p nunanut allanut tunngasunut ministerii Myanmarimi sakkutuunut naalakkersuisunik uppisitsisunut immikkut ittumik sukannersumillu aamma iliuuseqassallutik ataasinngornermi aalajangerput.
AAMMA ATUARUK Bidenip Myanmarimi sakkutuut immikkut ittumik sukannersumillu iliuuseqarfigineqarnissaat sioorasaarutigigaa
EU Myanmarip niueqatigisartagaasa annersaata pingajoraat. Myanmarimut aningaasanut tunngasunut ikiorsiissutit, EU-p nunanut allanut tunngasunut qullersaata Josep Borrellip oqarnera naapertorlugu, unitsinneqarput.
Myanmarimi sakkutuut nunami tassani tamat oqartussaaqataanerat tunngavigalugu naalakkersuinikkut siuttoq, Aung San Suu Kyi, februaarip aallaqqaataani uppisillugulu parteeqatai arlallit ilanngullugit tigusaraat.
Myanmarimi aqqusinerni tamatuma kingorna akerliussutsimik takutitsisorpassuaqartarpoq, sapaatillu akunnerata naanerani akerliussutsimik takutitsisut ilaat marluk aallaaneqarlutik toqutaasut, nutaarsiassaqartitsivik Ritzau allappoq.