Múte B. Egedep piujuartitsineq samminiaraa

Naalakkersuisut siulittaasuat, Múte B. Egede nunatsinni inuussutissarsiorneq pillugu ataatsimeersuarnerit annersaanni Future Greenlandimi ukioq manna ataatsimeersuarnermi oqalugiarpoq.

Ataatsimeersuarnerit qulingiluassaaq ukioq manna aaqqissuunneqarpoq.

Naalakkersuisut siulittaasuata oqalugiarnermini nunatta nunarsuup sinneranik suleqateqassaguni nunatta piujuartitsinerunissaa pingaaruteqarnerarpaa.

- Siullermik isumaqarpunga piujuartitsineq tamakkiisumik isiginnittumik isumaqartuusoq. Tassalu inuiaqatigiinni aningaasarsiornikkullu aammalu avatangiisinut tunngassuteqartut pingasut taakkua ataatsimoortillugit isigineqartariaqartut. Muté B Egede oqarpoq.

Naalakkersuisut puijuartitsisumik suliaqarnissamik siunertaqartut Naalakkersuisut siulittaasuata oqaatigaa:

- Innuttaasut piujuaqqullugit, nunarput piujuaqqullugu toqqammaveqartumik ingerlajuarnissarput, aammalu pisuussutigut tamakkiisumik isiginnilluni piujuaqqullugit ingerlanissamut siunertaqarpugut, taanna oqarpoq.

Piujuartitsinermut akisussaaffeqarneq

Tassami aamma nunarsuatsinni inuussutissarsiornikkut pissutsit avatangiisinut, inuiaqatigiinnut aqutsinikkullu piumasaqaateqaleriartornera maluginiarsimavaa:

- Avatangiisinut, inuiaqatigiinnut aammalu aqutsinikkut qanoq ingerlaaseqarneq taakkunuunalu piujuartitsisumik qanoq toqqammaveqartoqarnera avatangiisitta nunarsuami niuerfigisatta taanna annertusiartuinnaavittumik piumasaqaatigivaat, Muté oqarpo

Nunatsinnilumi inuussutissarsiortut piujuartitsinermik tunngaveqartumik ineriartornermut peqataasut taanna isumaqarpoq:

- Isumaqarpunga siuarsaajuarnissaq inuiaqatigiillu peqataatillugit ingerlanissaq taanna suleqataaffigalugu ineriartortittuartariaqaraat, ajunngivissumik nunatsinni inuussutissarsiortorpassuaqarpugut toqqammaviliilluaqataasunik inuiaat kalaallit ingerlalluarnissaannut. Muté B Egede taama oqarpoq.

Nunatsinnili inuussutissarsiornikkut ineriartoqqinnissamut suli inissaqartoq naalakkersuisut siulittaasuat isumaqarpoq:

- Isumaqarpunga aningaasarsiornikkut siuariartorsimavugut ukiut kingulliit arlallit, aammalu suli siuariartoqqinnissatsinnut periarfissaqarluarluta, aqqutissagut nutaat ujartortariaqarpagut aningaasarsiorfissagut nutaat ujartortariaqarpagut. Mute B Egede taama oqarpoq.