Tuluit aallartitaata Kalaallit Nunaannik suleqateqarneq nukittorsarusuppaa
Tuluit Nunaata Kunngeqarfik Danmarkimi aallartitaat Emma Hopkins isumasioqatigiinnermi Future Greenlandimi peqataavoq. Kalaallit Nunaanni inuussutissarsiornerup siunissaa isumasioqatigiinnermi sammineqarpoq.
Tuluit Nunaata Kalaallit Nunaanni soqutigisai taakkulu suleqatigiissutiginerat qanoq nukittorsarneqarsinnaanersut Emma Hopkinsip immikkut soqutigisarai.
- Nunanit tamalaanit pingaartinneqartut, ineriartornermi maluginiakkagut eqqartoriartorlugit maaniippunga, Emmma Hopkins oqarpoq nangillunilu:
- Siunissamut naleqqussarneq pitsaanermik qanoq angusinnaanerlugu qanorlu inuiaqatigiit peqataatissinnaanerlugit eqqartussavarput. Assiliaq tamakkiisoq aamma eqqartorusuppara, qanorlu Kalaallit Nunaannik suleqateqarnitta pitsanngorsarsinnaanera paasiniarlugu aamma maaniippunga.
Kalaallit Nunaata Tuluit Nunaatalu suleqatigiinnermikkut qanoq pissarsiaqarsinnaanerat apeqqutaalerpoq.
Emma Hopkinsip akissummini Kalaallit Nunaata aamma Tuluit Nunaata assigiissutai, assigiinngissutaalu ilinniarfiusinnaasut taakkartorpai.
- Tamatta qeqertarmiuvugut aalisagaaterpassuaqarlutalu. Tuluit Nunaanni aalisakkanik Kalaallit Nunaanneersunik nerisaqaagut. Allatigulli aamma suleqatigiinnitsinnik nukittorsaanissarput aamma soqutigisaraarput, oqarpoq nangillunilu.
- Issittumi ilisimatusarnermi suleqatigiinneq misilinniarlugu ukiut kingulliit marluk ingerlaneranni inissiivugut, tamannalu iluatsippoq. Suliat assigiinngitsut 15-it maanna ingerlanneqarput siunissamilu amerlanerulernissaat neriuutigaarput.
Suleqatigiinneruneq
Issittumi ilisimatusarneq Tuluit Nunaata immikkut pissarsiaqarfigilluarsinnaavaa.
Taamaammallu attaveqaqatigiilluarnissaq Tuluit Nunaannut pingaaruteqarpoq, maanilu ilisimatusarnermi paasisanik ingerlatitseqqiiniissaq aamma anguniarneqarpoq.
- Umiarsuit ilisimatusarnermi atorneqartartut marluk maanna avannamut ingerlaartippagut taakkulu Kalaallit Nunaata imartaaniissapput. Taamaaliornikkut kalaallit ilisimatusartut aamma iluaquserneqarnissaat neriuutigaarput. Tamaammat aap, assigiinngitsutigut tamatta iluaqutigisinnaasatsinnik ujartuivugut.
Taamaammallu ullumikkut oqariartuutaani tamanna pingaarneruvoq. Ataqatigiinneq suleqatigiinnerlu Kalaallit Nunaannut aamma Tuluit Nunaannut pissarsiaqarfiulluarsinnaapput.
Taamaammallu Emma Hopkinsip suleqatigiinnermik nukittorsaaqataasinnaanissani neriuutigaa:
- Suleqatigiinnitta nukittunerulersinnissaannut iliuuserisinnaasagut eqqartorpavut, aalisakkat niuernerlu kisimik pineqasanngimmata kisianni immaqa aamma aatsitassarsiorneq, silap pissusaata allanngoriartornera aamma ilinniartitaaneq suleqatigiissutaasinnaapput. Taakkununngalu sinaakkusiinissarput neriuutigaarput.
