Múte B. Egedep amerlanerusut akisussaaffimmik tigusitikkusuppai: Sulisinnaasut tamarmik sulissapput
Naalakkersuisut siulittaasuat Inatsisartuni oqaaseqartarfimmit ukiakkut ataatsimiinnermi ullormi siullermi ileqquusumik ammaanermik oqalugiarami tunuarsimaanngilaq.
Taassumami oqalugiarnini nunatsinni ilisimasaqarluartut assaallu sulisinnaasut amigaataanerat pissutigalugu utoqqaat illui meeqqeriviillu matoqqasariaqartalersinnaanerannik oqaaseqarluni aallartippaa.
- Oqartariaqarpugulli aamma isertuaatsumik, nunatsinni innuttaaqateqaratta sulinissamut ilaatigut piukkunnarseruttoraluarlutik tamakkiisumik sulinngitsunik imaluunniit sulinngilluinnartunik, taanna oqarpoq.
- Illuatungaani suliffeqarfippassuit sulisussanik amigaateqarlutik ukiut kingulliit nalaappaat unammilligassaqarfigeqisaminnik.
- Ersarissumik naqissusigassanngorpoq, inuit peqqillutillu pisinnaasut - tamarmik - sulissammata.
Innuttaasut sisamararterutaat sulinngitsut
Ukiakkut ataatsimiinneq ullumi aallartippoq – ukiakkut ataatsimiinnerup qinigaaffimmi ukiumik kingullermik aamma aallartitsivoq. Múte B. Egedemmi kingusinnerpaamik aappaagu apriilip arfernani qinersisoqarnissaa suaarutigisussaavaa.
Múte B. Egedellu oqarnera naapertorlugu politikerit maanna sulileqqissapput – qinigaaqqinnissartik piinnarnagu – kisianni tamatta pilluta.
Utoqqaammi illuini utoqqarnik isumaginnissinnaasunik sulisussaaleqisoqarpoq. Aamma meeraaqqerivimmi meeqqerivinnilu perorsaasut amigaataapput.
- Killiffipput imaannaanngilaq. Peqqillutami pisinnaatillutalu sulisariaqarnerput pisussaaffiusariaqarpoq, inuiaqatigiinni atugarissaartuarnissarput qulakkiissagutsigu, isumassortarialittavullu isumassorneqarluassappata, naalakkersuisut siulittaasuat oqarpoq.
Nunatsinni Naatsorsueqqissaartarfimmit kisitsisit naapertorlugit suliffeqanngitsut maanna 8.231-upput. Tamanna innuttaasut nunatsinni aalajangersimasumik najugaqartut 18-init 66-it akornanni ukioqartut sulisinnaasullu sisamararterutigaat.
Nunatsinnullu suliartortut amerlaneruleriartorlutik. Kangianit inuit 2018-imit 2024-mut suliartortut amerleriangaatsiarput. 2018-imi 423-t nalunaarsorsimapput. Ukioq manna 1.527-t nalunaarsorsimapput.
Suliffissallu nunatsinnit inuttalerneqarnissaannut amerlavallaartut, Aningaasaqarnermut Siunnersuisoqatigiit ukiup affaanut nalunaarusiamini ullut qulit matuma siorna saqqummersinneqartumi erseqqissaatigaa.
- Suliassaqarnerujussua ukiualunni ilungersuatitsingaatsiarpoq. Tamannalu suliffeqarfiit allallu sulisussarsiornerminni ajornartorsiutigisarpaat, Torben M. Andersen oqarpoq.
Nammineq aquut tigussagipput
- Immitsinnut aperisariaqarpugut. Avataaniit tikisitsiuassaagut? Avataaniit sulisussanik ujartuiuassaagut? Imaluunniit aquut nammineq tamakkiisumik tigusariaqalinngilarput?, Mute B. Egede eqqarsaatissiisumik aperivoq.
- Akisussaaffimmik tigusisut amerlanerusariaqarput. Pisortat kisiisa utaqqiinnarnagit. Iliuusissallu arlallit aallartittariaqarpavut.
Múte B. Egedep oqalugiarnerani Inatsisartut ataatsimiittarfianni issiaviit inoqanngitsut arriitsumik amerliartorput. Ataatsimiinneq minutsit 20-t qaangiunnerani nalunaaqutaq 11.20 aallartimmat qinikkat 30-t ataatsimiittarfimmiipput. Siulittaasorli oqalugiarunnaarmat 19-iinnaat suli isersimapput.
Mimi Karlsen (IA) Inatsisartut siulittaasuatut toqqarneqaqqippoq, Harald Biancolu (aamma IA) Tasiilameersoq Inatsisartunit tunuarluni. Tassunga taarsiullugu Edvard Nielsen Aronsen sinniisussatut iserpoq.