Munck Gruppen Nuummi coronartoqarnera pillugu: Tutsaqanngippallaarsimavugut
- Avammut attaveqarnitsinni tutsaqartarnerusimasinnaagaluarluta nassuerutigaarput, Munckimili sulisut akornanni tuniluunnerup iliuuseqarfiginissaa salliutissimavarput., Munck Gruppenimi pisortaaneq, Hans Christian Munck taama nalunaaruteqarpoq.
Mittarfiliortuni sulisuni coronap tuniluunnerani suliffeqarfiup iliuusai ineqarnermut, attaveqatigiinnermut naligiissitaanermullu naalakkersuisup, Naaja Nathanielsenip isornartorsioreeraalu Munck Gruppen taama akissuteqarput.
AAMMA ATUARUK Marlunngornermi misissortittut: Nuummi tunillatseqqittoqanngilaq
“Munck Gruppenimi tutsaqanngippallaarsimanerarlugit” Naaja Nathanielsen tusagassiutinut nalunaaruteqarluni ippassaq isornartorsiuivoq.
- Suliffeqarfimmiit siunissami qanoq iliorluni tamatta inuiaqatigiinni akisussaaqataanitsinnik kivitseqataanissamut oqariartuuteqartoqarnissaa amigaatigaara. Munck Gruppenip aqutsisuinit suliffeqarfimmi COVID-19-ip tuniluunneranik unitsitsiniarluni suliniutissat suut suliniutigineqarniarnersut pillugu ilisimatinneqarnissara qilanaaraara.
Pisortaq isornartorsiuinermut akissuteqartoq
Munck Gruppen pingasunngornermi ullaakkut akissuteqarpoq. Nuummi coronap tuniluunnera pingaarnertut ukkatarisimagitsik, attaveqarnertilli pitsanerusinnaagaluartoq, tusagassiuutinut nalunaarumminni allapput.
- Nuummi njugaqartut, politikerit tusagassiuutillu erseqqisumik attaveqarnissarput ujartortariaqarmassuk ajuusaarutigaarput, taakku nalunaarummi allapput.
Pisortaaneq, Hans Christian Munck ima itisiliivoq:
- Munck Gruppimi Suliffeqarfittut akisussaaffipput ilisimaarivarput, Kalaallillu Nunaatalu unammillernnartorsiornerani nangilluta kivitseqataa niassaagut.
AAMMA ATUARUK Køen til testcenteret var lang: Jeg var med til konfirmation
Munck Gruppip pisortaa nammineq juunip aallartisimatsiarnerani Nuuliartoq, oqartussanullu attaveqartussatut inissisimasoq, Munck Gruppenip ilisimatitsissutigaa.
- Coronap tuniluunnerata annikinnerpaaffimmiitinissaa pingaarnerpaatut isigigipput, erseqissassavara. Oqartussallu attaveqarfigilluarnissaat nangeqqissavarput, Hans Christian Munck oqarpoq.
Misissortinnerisa pingasut tunillatsissimanngitsoq takutikkaa
Corona mittarfiliortuni sulisuni tuniluuttoq, inunnut allanut siaruaatilersimasoq, ippassaq marlunngornemi paasineqarpoq.
Tamanna Munck Gruppenimi sulisut marluk sapaatit akunnerata naanerani kaffillertuniissimanerannik apersortittoortunilu nereqatigiinnermi peqataasimanerannik peqquteqarpoq.
Pineqartut marluk pingasoriarlutik misissortinnerminni taamani tunillanneqarsimanngitsut, suliffeqarfik allappoq.
Taakku Danmarkimut aallartussaagamik Munck Gruppenimi ungalusimajunnaarsimallutik akunnittarfimmiilersimapput.
AAMMA ATUARUK Tamaat isigalugu: Coronavirus pillugu killiffik
Pingajussaanik misissortinnerminni ersiuteqanngimmata coronamut killilersorneqarnerat atorunnaarsinneqarpoq.
Danmarkimulli pilersaarutaasutut juunip 15-ani aallarnissaminnut aqaguttoq juunip 14-ani misissorteqqipput. Tassanilu coronavirusimik tunillanneqarsimasut paasineqarpoq.
- Eqqaasitsissutigissallugu pingaartipparput, sulisutta sulinngiffianni uagut nakkutiginissaat suliassarinnginnatsigu. Maleruaqqusalli malinneqarnissaannut soorunami akisussaaqataavugut, Munck Guppen allappoq nangillunilu:
- Oqartussanit suliffeqarfitsinniilluunniit maleruaqqusat unioqqutinneqaraluarpata, unioqqutitsisoq erseqqissaavigineqassaaq ajornerpaappallu soraarsitaanermik kinguneqartinneqarsinnaalluni. Matumanili inuit angerlarsimaannartussaanngitsut Munck Gruppimiluunniit sulinngitsut pineqarput.
Tunillatsissimasoq Ilulissiartoq
Munck Gruppenip paasissutissiinerat naapertorlugu, suliffeqarfimmi sulisut marluk sapaatit akunnerani uani Ilulissani Kalaallit Airportsimik ataatsimeeqateqarsimapput, kingunerisaanillu tunillatsittoqarsimalluni.
- Tuniluunnissaq pinaveersaarniarlugu sulisut taakku marluk piaarnerpaamik angerlartinneqarput.
AAMMA ATUARUK Kalaallit Airportsimi sulisoq tunillatsittunut akuusoq
Tuniluuttoqalernissaa pinngitsoortinniarlugu Nuummiit angallanneq oqartussat ippassaq unitsippaat.
Angallattoqaqqusaannginnera juunip ulluisa 22-anut atuuppoq.
Nunatsinni tunillatsissimasutut paasineqarsimasut katillugit 49-pput. Maanna qulingiluat tunillatsissimasutut nalunaarsorsimapput. Taakkunannga ataaseq Dronning Ingridip Napparsimmavissuani peruluttut uninngavianniippoq, anersaartuuteqartinneqaranili.
