Coronamut misissortikkiartortoq: Apersortittoq pillugu nereqatigiinnermi peqataavunga
Sapaatit akunnerisa naaneranni persuarsiortoqarpoq. Nuannanneq nuanninnginnerusumik kinguneqarpoq. Tunillatsittummi nutaat tallimat ippassaq paasineqarput, taakkualu ilaat mittarfiliortunut suleqataanngillat.
Misissuisarfiup silataaniippoq Bastian Rosing, taanna sapaatit akunnerata naanerani persuarsiortunut akuuvoq.
- Ataatsimoortunut ilaanikuugatta, oqarfigineqaratta misissortikkiartussasugut. Apersortittumut qaaqqusaanikuugatta. Tupannalaarpoq kisianni aallatut ajornaqaaq, Bastian Rosing KNR-mut oqarpoq.
Misissortikkartortut ilaata, Bjarne Tjørnelund Andersenip, Nukissiorfimmi suleqataa allaffimmioqatigisaa tunillatsissimavoq. Paasissutissanillu pissarsiniarnini ajornartoq oqarpoq, naammangisimaanngilaalu.
- Sallaatsumik oqassaguma paatsuunganarpoq. Coronamut allattoqarfik oqaloqatigaara, taakkua tusagassorfinni atuarsinnaasunga oqaannarput. Kisianni suleqatiga tunillatsinnikuuvoq, taamaattumik paasisaqarnerorusukkaluarpunga,
Bjarne Tjørnelund Andersen oqarpoq. Nangipporlu:
- Akissutaat eqqortuunngillat. Oqartarput "una aperisinnaavat aamma una aperisinnaavat" qisuariartoqanngimmat nammineq qanoq iliornissara piareersaanarpara, Bjarne Tjørnelund Andersen taama oqarpoq.
Misissortikkiartortoq alla, Bjørn Holm, kapitereersimavoq. Tunillatsissimasorli isersimaqatigisimavaa.
- Positivemik testertissimasoq isersimaqatiginikuugatsigu, qulakkeerniaannarlugu maannarpunga. Taassuma nammineq sianerfigigamisigut ilisimatilluta susoqarnersoq.
Taassumalu tunillatsissimasoq apersortittoq pillugu nereqatigiinnermi kaffisoriarnermiluunniit naapissimanngilaa.
- Naamik isersimaqatigiinnarlugu inimi. Uanga kapitereernikuuvunga, tunillaassuisinnaaneq taanna mianernarpoq.
Inuppaasuit misissorneqartut unnugu akissutisinissaat ilimanartoq, nunatta nakorsaanera, Henrik L. Hansen ualisoq oqarpoq.