Marlunngornermi misissortittut: Nuummi tunillatseqqittoqanngilaq

Nuummi coronartumik nutaamik nassaartoqaqqinngilaq. Taamaattorli ullumikkut misissuinerit ingerlateqqinneqassasut, Naalakkersuisut ilisimatitsipput.
Nuummi coronamut misissortittarfimmut utaqqisut marlunngornermi siuleriiaattut. Assi © : Arkiv: KNR
Allattoq Nutaarsiassaqartitsivik / Nyhedsredaktionen
juunip 16-at 2021 06:47

Nuummi misissortittut akornanni tunillatsittoqarsimanngilaq.

Nuummi inuit 90-it missaanniittut coronavirusimik tunillanneqarsimanersut misissorneqarput, taakkunannga tunillatsissimasunik allanik nassaartoqanngilaq.

Misissortinnermi inernerit ippassaq unnukkut qulip missaannik naalakkersuisut nittartakkaminni saqqummiuppaat.

AAMMA ATUARUK Køen til testcenteret var lang: Jeg var med til konfirmation

Tuniluussinnaanerulli ulorianarunnaarneranik tamanna isumaqanngitsoq naalakkersuisut ilanngullugu erseqqissaatigaa, tunillatsissimasinnaasullu tamarmik angerlarsimaannarnissaannik kaammattorlugit.

Tunillatsissimasinnaasunut misissuisarfik ullumi ullaap tungaanit qulingiluaniit ammaqqissaaq, tunillatsissimasinnaasullu tamarmik misissortikkiartornissaannik kaammattorneqarlutik.

Coronamik tunillatsissimasup Ilulissaniittup attaveqarfigisimasai ulluni tulliuttuni malinnaaffigineqassapput.

Nunatsinni coronavirusimik tunillatsissimasut katillugit maanna qulingiluaapput. Nuummi arfineq pingasut Ilulissanilu ataatseq.

AAMMA ATUARUK Tamaat isigalugu: Coronavirus pillugu killiffik

Tuniluuttoqarnissaa pinaveersaarniarlugu Nuummiit ippassaq aallartoqaqqusaajunaarpoq, qaquguli aallartoqaqqissinnaanngussanersoq suli ilisimaneqanngilaq.

Nunatsinni tunillatsissimasutut paasineqarsimasut katillugit 49-pput. Maanna qulingiluat tunillatsissimasutut nalunaarsorsimapput. Taakkunannga ataaseq Dronning Ingridip Napparsimmavissuani peruluttut uninngavianniippoq, anersaartuuteqartinneqaranili.

Aamma atuaruk