MSC-mit nalilersuisoqalernera WWF-mit nuannaarutigineqartoq
![](/sites/default/files/styles/image_934x467/public/article_images/hellefisk_msc.jpg?itok=xfDXmIwO)
- Aalisarnerup piujuaannartitsinissaq tunngavigalugu ingerlanneqarnissaanut aalisakkanik suliffissuaqarnermi nammineerluni suliniuteqartoqalernera, nunarsuarmilu atuisartut akisussaassuseqarnissamik piumasaqaateqarnerannik paasinnittoqarnera nuannaarutissaavoq, uumassusilinnik ilisimatooq WWF-ip Nunatsinni immikkoortortaqarfianeersoq, Kaare Winther Hansen, KNR-imut taama oqarpoq.
- MSC-mik meqqilersuineq Kalaallit Nunaanni aalisarnermik siunissamut qularnaarinneqataasinnaavoq, qaleralinnilli Kalaallit Nunaanneersunik MSC-mik meqqilersuineq aamma Kalaallit Nunaata avataanut pitsaasumik sunniuteqarsinnaalluni, Winther Hansen taama isumaqarpoq.
Aamma atuaruk Avataasiorluni qaleralinniarneq MSC-mut nalilersorneqartoq
- Kalaallit Nunaannimi qaleralinniarneq nunarsuarmi siullersaalluni MSC-mit nalilersuiffigineqartussanngorpoq. Taamaammat aalisarnerup piujuaannartitsinissamik tunngaveqarnerusumik ingerlanneqarnissaanut Kalaallit Nunaat sunniuteqarsinnaavoq nunallu allat aalisarnerinut maligassiuisuulluni, WWF taama isumaqarpoq.
Kaare Winther Hansenilli erseqqissaatigaa suliassaq annertooq naammassiniarneqartussaassasoq.
- MSC-mik suliniutaasoq iluatsinneqassappat, taava aamma pisarisuukkat imartallu sunnertiasut isiginiarneqartariaqassapput, soorlu kilisaatit imartani nillerni koralinik, immap naqqata pupiinik uumassusilinnillu allanik ajoqusiisarnerat, WWF-ip Nunatsinni uumassusilinnik ilisimatuutut sulititaa Kaare Winther Hansen taama naggasiivoq.