Avataasiorluni qaleralinniarneq MSC-mut nalilersorneqartoq
![](/sites/default/files/styles/image_934x467/public/article_images/hellefisk_msc.jpg?itok=xfDXmIwO)
Royal Greenland nittartakkamini taama allaaserisaqarpoq.
Qallerallit nalilersorneqarnissaat qaammatini aqqaneq marluk missaanni sivisussuseqartussatut naatsorsuutigineqarpoq, nalilersuinerullu ingerlarnga pisarnertut tusarniaanernik ilaqartussaq apeqqutaatillugu 2017-imi juunimi naammassineqarnissaa pilersaarutaavoq. Royal Greenlandip nittartagaani tamanna atuarneqarsinnaavoq.
- Qalerallit avataani pisat ilisarnaaqquserniarnerisigut aalisakkanik tunisassiaatitta pingaarnerit ilaat MSC-mut akueritinniarnissaanut misilinneqartussanngorput. Aalisagaq taanna MSC-mit akuerineqarpat nunarsuarmi perngaataassagunarpoq, tamannalu aalisakkatut akuerisaasutut tuniniarneqarneranni pingaaruteqartussaavoq. Qalerallit MSC-mik ilisarnaaqqusikkat Europami piumaneqartorujussuupput, pisisartuttalu atuisunut tuniniaaqqinnissaminnut qilanaarutigisorujussuuaat, Royal Greenlandimi CSR-imi akisussaasuusoq Lisbeth Due Schoenemann-Paul naliliivoq.
Ilisarnaaqqusiisinnaanermut piumasaqaatit naapertorlugit qaleralinnik nalilersuineq arfineq marlunnik immikkoortortaqarpoq, taakkulu aatsaat naammassineqareerpata qalerallit nunatsinneersut ilisarnaaqquserneqarsinnaanerat aalajangerneqassaaq.
- Qalerallit piareersaataasumik nalilersorneqareerput, tamatumalu inernerata ersersippaa inernerutaasussamik nalilersuisoqarnissaanut tunngavissaqartoq. Taamaammat isumaqarpugut qalerallip ilisarnaaqquserneqarnissaanut ilimanaateqartorujussuusoq. Nalilersuinissami pisarnertut immikkut ilisimasalinnik pisortaqarfinneersunillu suleqateqarnissaaq pisariaqassaaq, nalilersuisoqarnissaanilu suleqatigiilluarnissarput qilanaaraarput, Lisbeth Due Schoenemann-Paul oqarpoq.
Qalerallit nunatta imartaani pisat 25 procentii tulaanneqartarput tunisassiorfinnilu suliarineqareeraangamik Europamut Kangianullu tuniniarneqartarput. Sinneri qeritillugit nunanut allanut tunineqartarput, pingaartumik Kangianut.