MSC-mik uppernarsaateqalerneq aalisarnermut pingaaruteqarpoq
Tamannalu KNAPK-mit nuannaarutigineqarpoq.
- Taamattut uppernarsaasiisarneq ullut tamaasa pineq ajorpoq. Nunatsinnilu aalisakkat MSC-mik uppernarsaatillit maannamut marluinnaat peqaraluarput tassa raajat saarulliit Barentip Imartaani pisaat kisimik uppernarsaateqaraluarlutik. Tassalu nipisaat maanna aamma uppernarsaateqalerput tamannalu Nunatsinni aalisarnermut pingaaruteqarpoq, KNAPK-mi pisortap tullia, Tønnes Berthelsen taama oqarpoq.
MSC-mik nipisaat meqqeqalerneranni nipisaat suaat Nunatsinneersut niuertarfissuarni tamalaani maanna tuniniarneqarsinnaalerput. MSC-millu nipisaat meqqeqalernerat aamma taakku nungusaataanngitsumik Nunatsinni piniagaanerinut uppernarsaataavoq, Nunatsinnut pingaaruteqarluartoq.
Aamma atuaruk Nipisat MSC-mik meqqeqalerput
Royal Greenlandip nipisaat suaannik avammut niuernerannut, nipisaat MSC-mik meqqeqalerneri aalisakkanik suliffeqqarfissuarmut pingaaruteqarluartussaassasoq, Royal Greenlandimi CSR-imut akisussaasuusoq, Lisbeth Schönnemann-Paul oqarpoq naqissuserlugulu nunarsuatsinni niuertarfinnut suaat tuniniagaanerinnut tamanna iluaqutaalluassasoq.
- Nipisaat suaasa MSC-mik meqqeqarnissaat, Tysklandimi Sverigemilu pisisartunit piumasarineqarnerusarpoq. Nunallu taakku tassaapput suannik avataaniit tikisitsinerpaajusartut. Taamaattumik Nunatsinni nipisaat meqqeqalerneri taakkuninnga ilisimaneqarnissaat pingaaruteqarluarpoq, Lisbeth Schönnemann-Paul oqarpoq.
Nipisaat Nunatsinneersut MSC-mik meqqeqalerneri, nunarsuatsinni tamanit ilisimaneqarnissaat pingaaruteqarluartoq, KNAPK-p pisortaata tullia, Tønnes Berthelsen aamma isumaqarpoq.
Aamma aalisartunut, igammik sinerissap qanittuani aalisartunut tamanna iluaqusiijumaartoq oqarluni.
- Atlantikup Avannaani nipisaat suaasa tunitsivissaqartuarnissaat maanna qularnaarneqarpoq. Nipisaallu suaat aasaq manna tunineqarsimasut aalisartunut ukiup naalernerani iluaqutaasussaassapput, tassa suaat tunisat akii 2 koruuninik qaffappaoq, tamannalu aalisartut juullilernerani tapissutigissavaat, KNAPK-p pisortaata tullia, Tønnes Berthelsen taama oqarpoq.
