Siniffiit 500-t. Takornarissat amerliartorneri malinnaavigiumallugit Nuummi 2030 tungaanut siniffissat taama amerlatigisut pilersinneqartariaqarput. Nuuk tallimanik hoteleqarpoq, vandrerhjemmit tallimat inuillu unnuisitsisartut arlallit, taakkua amerlassusaasa 50%-ii suli pisariaqartinneqassapput.

Ukiut arlaqanngitsut qaangiuppata Nuummi unnuisarfiit amigaataalissasut Visit Greenlandip nalunaarusiaani inerniliissummi erserpoq.

Niuerneq pitsaasoq

Martin Nordlund Nuummi najugaqarpoq, filmiliornermillu suliffeqarfimmut Malou Mediamut piginnittuulluni. Nunatsinni, Danmarkimi Spaniamilu Airbnb aqqutigalugu attartortitsisarpoq, tassanilu Nuummi marluk attartortittagaralugit. Taamatut attartortitsisarneq niuernitsialaasoq tassani takusinnaavaa.

- Aalajangersimasumik attartortitsinermi aki aalajangersimasuusarpoq niaqorluutissakinnerullunilu. Airbnb-li aqqutigalugu attartortitsineq aalajangersimasumik attartortitsinerminngaanniit isertitaqarnarneruvoq, Martin Nordlund oqarpoq.

Assi © : Privatfoto

Nuummi ineqarnissamut ukiorpassuit utaqqisoqartarpoq. Sooruna innuttaasunut inimik pisariaqartitsisunut attartortiniarnak aalajangersimasutit?

- Taakku assigiinngitsut marluk pisariaqartinneqartut oqartoqarsinnaavoq. Soorunami tamanna eqqarsaataasarpoq, kisiannili iluanaarutit taama nikingatigitillugit eqqarsarluarnissaq toqqarpara.

Aalajangersimasumik attartortitsinermi ukiumut 150.000 koruunit isertinneqarsinnaappata Airbnb-mi 300.000 koruunit tungaannut ukiumut isertinneqarsinnaasut taassuma erseqqissarpaa.

Takornarissat innuttaasullu inissaqarnissaat

Birgit Leick Norgep kujataata kangisissuani Aningaasaqarnermut instituttimi universitetimi professoriuvoq. Issittumi, ilaatigut Norgep avannaani Islandillu avannaani Airbnb-p innuttaasunut sunniutaa misissornikuuaa.

Sivikitsumik attartortitsisartut amerlassusaat maluginiarluarneqartariaqartut taanna isumaqarpoq.

Assi © : Privatfoto

- Illuutillik aalajangersimasumik attartortitsinatik Airbnb aqqutigalugu attartortitsisarnerat ajornartorsiutaasinnaavoq. Ingammik sumiiffimmi inissamik ajornartorsiuteqareersumi.

Nuummili ineriartornermut malinnaasoqassappat takornarissanut unnuisarfiit amerlanerusariaqartut Martin Nordlund isumaqarpoq.

- Mittarfittaarsuassat malitsigalugit takornariaqarnerup ineriartortinnissaa eqqarsaatigalugu takornarianut unnuisarfiit amigaataaneri Nuummi ajornartorsiutit annerpaat ilagaat.

Martin Nordlundittaaq erseqissarpaa Nuummi inaataatini qaammatit pingasut tungaannut attartorneqarsinnaasartut, taamaalilluni Illoqarfimmut suliartortut attartorsinnaasartut.

- Piffissaq aalajangersimasoq takornariarpassuaqartarpoq, kisiannili aamma piffeqartarpoq takornariaqarpiarani. Qularnaveeqqussummik akiliuteqartanngilaq, Airbnb-mut akiliiginnartarput, attartugartillu qimakkaangamikku matuersaatit ileqqiinnartarpaat.

Airbnb "piumasaarsorfiuvoq"

Birgit Leickip Airbnb iluaqutitaqarnera paasisinnaavaa - tassani takornariakinnermi attartortitsineq - ingammik naleqqussartoqartinnagu.

- Airbnb inatsit tungaatigut "piumasaarsorfiuvoq". Hotelimik ammaassaguit akuersissuterpassuarnik piumasaatitaqarpoq. Kisiannili kinaluunniit apeqqusersorneqarani Airbnb aqqutigalugu attartortitsisinnaavoq, taanna oqarpoq.

Issittumi sumiiffiit arlallit nunat tamalaanit tikikkuminarsiartorput, tamannali siunissaq eqqarsaatigalugu takornariaqarpallaalernermik kinguneqarsinnaasoq, Birgit Leick isumaqarpoq.

Tamannalu Islandimi misigineqarnikuuvoq. Islandimi ukiup siuliani Airbnb aqqutigalugu ukiumut ullut 90-it sinnerlugit attartortitsinissap inatsisitigut inerteqqutaalersiinermik aalajangiisoqarpoq.

- Takornariaqarpallaarneq innuttaasunut assigiinngitsutigut ajortumik kinguneqarsinnaasarpoq, inissamillu amigaateqalerneq pisarpoq. Mittarfittaassarsuarmillu ammaaneq sukkasuumik sunniisinnaavoq.

Birgit Leick naapertorlugu Airbnb-kkut attartortitsisartut imminnut eqiterutinnginnissaat anguniarlugu inuinnaat attartortitsisarnerat pillugu naleqqussaasoqartariaqarpoq.

- Kalaallit Nunaanni politikerit sivikitsumik attartortitsisarneq pillugu aaqqiisariaqartut isumaqarpunga. Takornariaqarpallaalereeraangammi allanngortitsiniarneq ajornarnerusinnaasarpoq.

Suli siusippoq

Martin Nordlund ineriartorneq pillugu ernummassuteqanngilaq, kisiannili inuinnaat attartortitsisartut siunissami ajornartorsiutaalersinnaanerat paasisinnaavaa.

- Nunatsinni Airbnb aqqutigalugu attartortitsineq suli nutaajuvoq. Spaniami Danmarkimilu attartortitsinerup tungaatigut pissutsinik sakkortunerusunik misigisaqarnikuuvunga. Taamaattumillu ukiut qulit qaangiuppata qaqeqqinneqarsinnaappat pitsaassaaq.

Nuummi Airbnb aqqutigalugu attartortitsisarnerup ineriartornera pillugu KNR Airbnb-mut saaffiginnippoq, Airbnb-li saaffiginnissutitsinnut suli akissuteqanngilaq.