Iluliamineq qiperugarpalaartoq Nuutoqqap saani puttarujoorpoq naajallu talittarfiup eqqaaniittut qarlullattaarput. Oktobarimi ulloq seqinnarissuummat angallatit kangerlummukaasut amerlavipput, Arnarulunnguullu eqqaassutissaata nutaap eqqaani KNR-ip Navarana Bidstrup naapippaa.   

Taassuma Qeqertarsuup Tunua takornarianut pilerinarsarniarlugu Aasianni takornarialerisut allaffianni ulluinnarni sulisarpoq. Sulisut marluinnaasut suliassaaleqisanngillat, mittarfissuarmi ammarpat takornariat Qeqertarsuup Tunuanukartartut amerlingaatsiassangatinneqarput.

- Ilulissani mittarfissuup ammarnissaa eqqarsaatigileraangakku Qeqertarsuup Tunuani akunnittarfiit unnuiffiusinnaasullu amerlinissaat neriuutigisarpara, Navarana Bidstrup oqarpoq seqerngullu tungaanut isigaluni uisorersarluni.

Takornariat siammarneqassasut

Naak mittarfissuup 2026-mi aatsaat ammarnissaa pilersaarutaagaluartoq, taamaattoq akunnittarfiit imaaliallaannarlutik pinngorsinnaanngillat, inuillu Airbnb aqqutigalugu iniminnik attartortitsisartut amerlanngillat. Allatut oqaatigalugu, Qeqertarsuup Tunua takornariaqarnerulernissamut suli piariinngilaq.   

- Nunani allani booking.com imaluunniit Expedia aqqutigalugit unnuiffissanik nassaarnissaq ajornanngitsunnguuvoq, nunatsinnili pingaartumik taavani suli tassunga killinngilagut. Taamaattumik takornariat Qeqertarsuup Tunuanukalersinnagit qanoq sunillu periarfissaqarnerannik paasissutissilluartariaqarpagut.  

Takornariat illoqarfimmi tikinneqarnerpaasartumi tamarmik eqiterussuutiinnaratik siammarnissaat Qeqertarsuup Tunuani takornarialerinermut periusissiami anguniagaavoq.

Qasigiannguani “nunaqarfik uumassusilik” takornarianit alakkarneqarsinnaavoq, tassanilu ukiut tuusintilikkaat matuma siorna qanoq inuusoqarsimanera takuneqarsinnaavoq. Assi © : Camilla Egeborg Møller

- Takornariat Ilulissaniiginnaratik illoqarfinni assigiinngitsuni periarfissaatitsinnik misigisassarsiortikkusuppagut.

Periusissiamut atatillugu Destination Diskobay Aasianni, Qasigiannguani Qeqertarsuarmilu takornarialerisunut najoqqutassiorput. Najoqqutassat ilaatigut sumut tamaanga eqqaannginnissamut, inunnik assiliiniarnermi akuersititseqqaarnissamut, nunaqartunut akiliuteqartarnissamut aamma qimmit qimuttut qanillinnginnissaannut tunngassuteqarput.    

- Takornariat nunarput kulturerpullu ataqqissavaat, illoqarfiillu artukkerneqassanngillat. Assersuutigalugu pisuffiusartut immikkuullarissut eriagineqassapput, Navarana Bidstrup oqarpoq.   

“Takornariat misigisassarsiorusuttut”-nik taaneqarsinnaasut, tassa silami sammisaqarlutik takornariarusuttut tassaanerupput taavani takornariarnissamut pilerilersinneqarusuttut, aammali inuiaqatigiinnut atassuteqarsinnaassasut Navarana Bidstrup isumaqarpoq.   

- Takornariat ilaat pinngortitami misigisaqarniaannarlutik nunaqartunullu tapiissuteqaratik tikittarput. Tamanna ineriartortitsineruallaanngilaq, kisiannili takornariat kulturimut tunngasunik paasisaqarusuttut tapiissuteqarusuttullu aamma takusarpagut, taakkuuppullu innuttaasunit tikilluaqquneqarnerukkajuttut.  

Unnuinermut akitsuut ajoqutaassanngitsoq

Unnuinermut akitsuut inummut ataatsimut 30 koruuniusoq Inatsisartut ukiaanerani ataatsimiinneranni siunnersuutaasoq Navarana Bidstrupip ajoqutaassangatinnagu iluaqutaaginnassangatippaa.

- Unnuinermut akitsuut 30 koruuniusoq pissusissamisoortutut isigaara. Nunani allani angalagaangama akunnittarfinni taama akitsuuteqartitsisarneq pissusissamisuuginnartarpoq. Qujanartumilli takornariaqartarpoq nunatsinni akiliillutik misigisaqarusuttunik, taanna oqarpoq.  

Pisiniarfiit katersugaasiviillu inissisimaffii aamma pisulluni aqqutaasartut sumiinnerinik paasissutissat ilanngullugit Destination Diskobay illoqarfiit assiliortitseqqammerpoq. Taassuma saniatigut Navarana Bidstrup illoqarfinni assigiinngitsuni innuttaasut takornarialerinermik inerisaaneranni siunnersoriartorlugit angalakkajuppoq.    

Navarana Bidstrupip takornariaqarnermi pisut kingulliit paasisimasaqarfiginiarlugit nunatsinni nunanilu allani angalangaatsiartarpoq. Assi © : Camilla Egeborg Møller

- Takornarialerineq arriitsumik ineriartorusaarpoq. Maanimut arlallit soorlu angallassisalernissamik qimussiussisalernissamillu suli soqutiginnipput.

Unnuisarfiit ukioq tamaat atorneqarsinnaaqqullugit ukiuunerani takornariaqarnerup ineriartortinneqarnissaa Destination Diskobayip kissaatigaa. Taamaaliornikkut pingaartumik Ilulissani aasaanerani ulapputerujussuartoqarpallaarunnaarsinnaanissaa anguneqarsinnaassaaq.

- Unnuiffiusinnaasunik amerlanerusunik amigaateqalertussaavugut. Angalasummi Ilulissani atuarfimmi tamarmik ataatsimoorlutik siniffinni quleriissitani patitittakkanilu sinittariaqartartut takoreerparput. Taammaattoqaqqissinnaassaarlu, taanna nassuerpoq.    

Timmisartuutileqatigiiffiit Diskolinemik allanillu angallassisartunik suleqateqanerminnik pitsaanngorsaappata takornariat aqqusaat illoqarfinnut unnuiffissalinnut angallanneqartalernissaat Navarana Bidstrupip neriuutigaa, Ilulissaniimmi Qeqertarsuup Tunuani illoqarfinnut allanut angallassineq sivisunerpaamik akunnernik marlunnik sivisussuseqartarpoq.  

Angalasut ilisarisimanngisamik akornanni haalini unnuisassanngippata pitsaanerusumik aaqqiisuteqartoqartariaqartoq, taanna isumarpoq.

Navarana Bidstrup issittumi takornariartaatileqatigiiffiit Norgemi ataatsimiinnissaannut peqataajartorlugit ullualuit qaangiuppata aallassaaq. Umiarsuimmi takornariartaatit 500-nit ikinnernik ilaasullit Destination Diskobayip soqutigineqartinneruai, taamaalilluni takornariat nunatsinnilu innuttaasut amerlavallaaleratik illoqarfimmiissinnaanissaat anguneqarsinnaassammat.