Nunatsinni unnuinerup takornarianut akisunerulernissaanik naalakkersuisut siunnersuutaat Inatsisartuni amerlanerussuteqartunit tapersersorneqarpoq.

Nunarpummi takornarianut unnuinermut ullormut 30 koruuninik akiliuteqartitsisalernissaq naalakkersuisut siunnersuutigaat, siunnersuutaallu taanna Inatsisartut ukioq manna ukiakkut ataatsimiinnerminni siullermeeqqammerpaat.

Akiliuteqartitsisalernissamillu siunnersuut akuerineqassappat, nunatsinnut najugalinnut atuutilernavianngilaq. Nunatsinnili unnuineq assersuutigalugu ilaqutariinnut marlunnik meerartalinnut nunanit allaneersuusunut sapaatit akunneranut 840 koruuninik akisunerulissaaq, taakkualu akunnittarfimmiinnersut, unnuisarfimmiinnersut, inimi attartukkamiinnersut, illuaqqamiinnersut tupermiluunniit attartukkamiinnersut apeqqutaassanngilaq.

Unnuinermut akiliuteqartitsinermit isertitat kommunit karsiinut tuttartussat nunatsinni takornariartitsinermik ineriartortitsinermut atorneqartarnissaat siunniussaavoq.

- Immikkoortut takornariaqarnerulernermik sunnerneqartut takornarianut innuttaasunullu iluaqutaasumik tikeraanik tikittartut aqutsinissamut isumalluutinik aamma sakkussaqartinneqarnissaat pingaartipparput. Akiliuteqartitsinermillu isertitat kommunit akornanni agguaanneqartassapput, aningaasaqarnermut akileraartarnermullu naalakkersuisoq Erik Jensen (S) siunnersuutip Inatsisartuni siullermeerneqarnerani oqarpoq.

Allaffissornikkut pisarissersuutaavallaassangatinneqartoq

Siunnersuut takornarialerisunit nunatsinnilu kommuninit ataatsimut isigigaanni tapersersorneqartoq, siunnersuutip tusarniaassutigineqarnerani akissutini allaqqavoq. Iluanaaruteqarfiunnarnanili allaffissornikkut aamma pisarissersuutaavallaassangatinneqarpoq.

Hotel Qaqortup pisortaa piginnittualu Jim Riis taama isumaqartunut ilaavoq.

- Nangaassuteqarpunga. Assersuutigalugumi akiliuteqartitsinermit isertitat 5 millionit koruuniuppata taakkunanngalu 3 millionit allaffissornermut atorneqarpata, taava iluanaarutaasut suliniutinut atorneqarsinnaasussat 2 millionit koruuniinnaassapput. Taamaammat taamaaliorutta sumut iluaqutaassagami, taanna oqarpoq.

Taamaammat nunatsinni akileraariaaseq atorluarneqarnerusinnaasoq, akunnittarfiutik isumaqarpoq.

 - Iluanaaruteqarfigisinnaasatsinnik takornariaqarnerulernissaq sulissutigissavarput. Tamanna takornarialerinermi suliffissaqartitsinerulertussaassallunilu akileraarutitigut isertitaqarnerussutaasussaassaq, Jim Riis oqarpoq.

Naalakkersuisut nunatsinni aappaagu unnuinerit akiliuteqartitsiffiulersaartut 200.000 missaanniissangatippaat. Nunarput takornarianut unnuinermut akiliuteqartitsisalissappat, tassannga isertitanit nunatsinni kommunit karsiinut 2026-miit tuttartussanik 6 millionit koruuninit ikinnerunngitsut iluanaarutaasassangatinneqarput.

Nunatsinnullu takornarianut unnuinermut akiliuteqartitsisalernissaq Naalakkersuisut 500.000 koruunit 1 millionit koruunillu akornanni akeqassangatippaat. Tamatuma saniatigut allaffissornikkut aqutsinermut aningaasartuutit ukiumut 300.000 koruunit missaanniissangatinneqarput. Unnuinermullu akiliuteqartitsisoqartalissappat, tamanna unnuiffissaatillit allaffissornerulernerannik aamma kinguneqartussaassaaq.