Mittarfiit tallinissaat kinguartinneqarnissaat ernumagineqartoq
Leo Larsenimmi tunuarneratigut Ilulissani mittarfiup tallineqarnissaa kinguarsarneqassasoq aarlequtigaat.
- Suliap kinguarteqqinnissaa ernumassutigivarput , Qaasuitsup kommuniani kommunalbestyrelsemut Siumut sinnerlugu qinigassanngortittoq, Ane Lone Bagger, KNR-imut oqarpoq.
Taassuma Siumumiillu qinigassanngorteqataata Johanne Olsenip erseqqissarpaat, mittarfiup tallinissaa kommunimi inuussutissarsiornikkut ineriartornermut pingaaruteqarluinnartoq.
- Nalunngilarput Ilulissat takornariaqarfissuusoq. Taamaattumik takornariat aamma ornikkusutartik ajornannginnerpaamik ornikkusuttaraat aamma ilisimaneqarpoq.
Leo Larsen Kalaallit Airportsimi ukiup affa siulittaasooreerluni 2016 naalersoq tunuarpoq.
Tunuarneratalu mittarfiliortiternermut suna kingunerinnaaneraa, Namminersorlutik Oqartussat piginneqatigiiffiutaata nalunaarutigissagaa, Ane Lone Bagger isumaqarpoq.
- Suliap sumut killinnera paaserusupparput. Suliap tuaviortumik peqqissaartumilli suliarineqarnissaa pisariaqarpoq, Ane Lone Bagger oqarpoq.
AAMMA ATUARUK Leo Larsen aporaattoqannginneraavoq
Kalaallit Airportsimiit ullumi oqaaseqartitsisinnaanngilagut.
