Kalaallit Airportsimi siulittaasoq siulittaasutut tunuarpoq
Kalaallit Airports A/S-imi siulittaasoq Leo Larsen siulittaasutut tunuarpoq. Kalaallit Airports siulersuisunut ilaasortaq Jákup Kass KNR-imut taama ilisimatitsivoq.
Leo Larsen siulittaasutut 2016-ip naajartulernerani tunuarpoq, Namminersorlutillu Oqartussat suliffeqarfiutaanni ukiup affaata missaani siulittaasuulluni. Suliffeqarfik Qaqortumi mittarfissap pilersinneqarnissaanut atatillugu pilersinneqarpoq, soorlu aamma Nuummi Ilulissanilu mittarfiit tallilerneqarnissaannut atatillugu pilersinneqartoq.
Leo Larsenip siulersuisuni siulittaasutut tunuarnissani nammineq kissaatigisimagaa Jákup Kassip oqaatigaa, Kalaallit Airportsimilu aaqqiagiinngissuteqarsimaneratut isigineqassanngitsoq aamma oqaatigalugu.
AAMMA ATUARUK Mittarfinnik talliliinissaq qanilliallattoq
Kalaallit Airports siorna pilersinneqarmat Leo Larsen siulittaasutut inissippoq, Danmarkimi suliffeqarfimmi Sund & Bæltimi pisortaanertut aamma sulisimalluni. Suliffeqarfik taassuma Store Bæltsbroenimik Øresundsbroenimillu sanatitsisuulluni.
Leo Larsenip siulittaasutut tunuarnera pillugu Naalakkersuisut siulittaasuata naalakkersuisoqarfia oqaaseqarusunngilaq.
Kinalu Namminersorlutik Oqartussat suliffeqarfiutaanni tassani maanna siulittaasunngussanersoq suli aamma ilisimatitsissutigineqanngilaq.
AAMMA ATUARUK Mittarfeqarfiit unammillerneqassanngillat