Leo Larsen aporaattoqannginneraavoq
Namminersorlutik Oqartussat pigisaanni Kalaallit Airportsimi siulittaasutut tunuarnini ajornartorsiuteqartoqarneranik peqquteqannginnerarpaa. Ingerlatseqatigiiffik pilersinneqarsimavoq mittarfissualiornissat piviusunngortinneqarnissaat anguniarlugu.
Akerlianit pilersaarutit malillugit Kalaallit Airports ineriartortinneqarsimavoq, tassalu Qaqortumi mittarfiliornissap pilersaarusiornera sananeqarnissaa akilersorneqarnissaa, mittarfiillu Nuummiittup Ilulissaniittullu tallineqarnissaasa pilersaarusiornerat pilersaarutit malillugit ingerlasimasut, maanna siulittaasuujunnaartoq oqarpoq.
Kalaallit Airportsimi siulittaasuusimasoq KNR-imut erseqqissaavoq siulittaasuujunnaariataarnini taamaalaat inuttut privatitut peqquteqartoq.
- Namminersorlutik Oqartussanut soraarniuteqarama taama tunngavilersuivunga, Leo Larsen oqarpoq.
Ukiup affaa missiliorlugu tassani pisortaareerluni Namminersorlutik Oqartussat pigisaanni taamaalilluni ajornartorsiortoqannginnerarpaa.