Mittarfeqarfiit oqaluttuarisaanermi sinneqartooruteqartut
Greenland Airportsip ingerlatseqatigiiffimminnut sisamanut 2023-mi ukiumoortumik nalunaarutit sapaatip akunnerata siuliani saqqummiuppai.
Mittarfeqarfiit A/S-ilu mittarfinnik pioreersunik ingerlatsisuusoq ingerlalluarneruvoq.
Ingerlatseqatigiiffik taanna siorna suli akileraarusiinnginnermi 42,2 millionit koruuninik sinneqartooruteqarpoq, taakku ukiup siulianut sanilliullugit pingasoriaammik amerlanerupput. 2022-mi akileraannginnermi sinneqartoorutit 12,8 millionit koruuniupput.
Greenland Airports tusagassiuutinut nalunaarummi paasissutissiivoq.
- Issittoq aamma Kalaallit Nunaat timmisartuutileqatigiiffiit angalasullu pimoorussamik
Oqaluuserisassaanniilersimapput, Greenland Airports – Mittarfeqarfiit – Nunap immikkoortuini pisortaaneq, Henrik Estrup oqarpoq.
Taamaammat nunatsinnut aamma takornariaqartarpoq, tamannalu ingerlatseqatigiiffiup naatsorsuutaani takuneqarsinnaavoq.
- Sinneqartooruteqarneq angallannerup 11 procentinik annertuseriarsimanerata toqqaannartumik kinguneraa, tamannalu timmisartoqarfinni qulimiguulinnullu mittarfinni sulisutsinnut pikkorissunut 2023-mi aasaanerani angallaffiusumi annertoorujussuarmik ulapaartitsisimavoq, Henrik Estrup oqarpoq.
Ingerlatseqatigiiffii allat amigartooruteqartut
Greenland Airportsilli sinneri sinneqartooruteqarujussuarnermik sinneqartooruteqaannarnermilluunniit nuannaarutiginnissinnaanngillaq.
Kalaallit Airports Holding A/S Greenland Airportsimi piginneqataaffik pingaarnersoq 2023-mi 235 millionit koruuninik ingerlatsinermi amigartooruteqarpoq, ukiup siuliani amigartoorutaasut 149 millionit koruuniupput.
Naak Mittarfeqarfiit angusarissaaraluartoq ingerlatseqatigiiffit allat marluk ataatsimut inernernik apparsaavoq. Kalaallit Airports Domostic A/S aamma Kalaallit Airports International A/S ataatsimut ingerlatsinermut 278 millionit koruuninik amigartooruteqarput.
Ukioq mannalu pitsaanerulertussaarpasinngilaq. Piginneqatigiiffiup pingaarnerup 2024-mi 450 millionit koruuninik amigartooruteqarnissaq naatsorsuutigaa.
Kalaallit Airports Domestic A/S mittarfiliornermut 2023-mi katillugit 263 millionit koruuninik aningaasaliisimasut, taakkunanngalu 212 millionit koruunit timmisartup mittarfissaanut atorneqartut, ingerlatseqatigiiffiup ukiumoortumik naatsorsuutaani allassimavoq.
Nunanit tamalaanit mittarfissaq ammangajalersoq
Nuummi, Ilulissani Qaqortumilu mittarfiit pingasut 2026 naannginnerani piareersimassapput. Illoqarfiit pingaarnersaanni nunanit tamalaanit mittarfissaq novembarimi piareernissaa naatsorsuutigineqarpoq.
Timmisartukkut angallattoqalernerunerata mittarfiit nutaat ammarpata nunatsinnut tamanna pitsaasuussasoq takussutisserpaa. Greenland Airports tusagassiuutinut nalunaarummi allappoq.
Greenland Airportsimi pisortaanerup, Jens Lauridsenip timmisartukkut angalasartut amerliartuinnassasorai.
- Timmisartoqarfiit naatsumik oqaatigalugu Kalaallit Nunaanni innuttaasunut aammalu inuiaqatigiinnut kalaallinut aammalu Kalaallit Nunaata aningaasaqarneranut suli annertunerusumik iluanaaruteqartitsissapput, Jens Lauridsen oqarpoq.
Taassuma Greenland Airportsip timmisartuutileqatigiiffiit nunanillu tamalaanit angalatitsiviit allat nunatsinnit nunatsinnullu timmisartukkut aqqutit nutaat ineriartortinneqarnerat pillugu qanimut oqaloqatigiissuteqarfigigai ilanngullugu oqaatigaa.
