Mittarfeqarfiit mittarfissuassaniit aningaasatigut eqqugaasut

Mittarfiliortiterneq Mittarfeqarfiit aningaasaqarneranut ilungersunartorsiortitsivoq.

Naalakkersuisut mittarfeqarfinnut nalunaarusiaani tamanna allaqqavoq.

Nuummi Ilulissanilu mittarfissualiornermut atatillugu taakkuninnga ingerlatsineq Mittarfeqarfinniit Kalaallit Airportsimut tunniunneqarpoq, tamannalu Mittarfeqarfinnut ilungersunartoq, Attaveqatigiinermut naalakkersuisoq Naaja Nathanielsen oqarpoq.

AAMMA ATUARUK Naalakkersuisut Qaqortumi mittarfimmit allamik qinigassaqarnissamut periarfissaqartitsisut

- Kingunerisassaa paatsuugassaanngilaq. Mittarfeqarfiit mittarfeqarfinnik heliportinillu ingerlatsisinnaaqqullugit aningaassaliiffigineqartariaqarpoq, taanna oqarpoq, pisortallu piginneqatigiifiutannit allanit agguagarsianik Mittarfeqarfinnut aningaasaliisarneq eqqaasitsitssutigalugu.

Mittarfeqarfiit aningaasatigut inissisimanerat nikallunganartuusutut oqaatigaa.

- Taarsersoruminaatsitaminnik akiitsoqarput, aserfallatsaaaliinissamullu kinguaattooqqammat aningaasarpassuarnik tamatumunnga illuartitsisariaqarluni. Isaatitsifigisartakkanilu marluk maannakkorpiaq annaasussanngorpaat, siunissami isertitakinnerulertussanngorlutik. Taamaatumillu aningaasaqarnikkut ilungersunartorsiorput, taanna oqarpoq.

Qanoq ajortigisumik inissisimasoqarnera nalunarpoq, 2020-mummi missingersuussiaq Mittarfeqarfinniit suli saqqummiunneqanngilaq.

Aningaasakilliortoq

Mittarfeqarfiit nunatsinni mittarfeqarfiit heliportillu - imminnut napatissinnaanngitsut ilanngullugit- ingerlannissaannut pilersitaavoq.

Nuummi Ilulissanilu mittarfeqarfinnik ingerlatsinermi iluanaarutinik pissarsisinnaasarsimammata tamanna pisinnaasimavoq, isertitalli taakkua tammartussaapput.

Naalakkersuisut Mittarfeqarfiit piginneqatigiiffinngortinniarlugit, Kalaallit Airports Holdingillu ataani inissisimasunngortinnissaat massakkut sulissutigaat.

Aamma Mittarfeqarfiit kiffartuusinissamut isumaqatigiissuteqarnikkut aningaassaqarnerisa siunissami qulakkeernissat Naalakkersuisut sulissutigaat.

AAMMA ATUARUK Mittarfiliornerit: Aningaasat asfaltimut atorneqartut inunnik isumaginninnermut atorneqarsinnaagaluarput

- Naalakkersuisut Mittarfeqarfinnik mittarfiit imminut akilersinnaanngitsut pillugit kiffartuusinissamut isumaqatigiissuteqarfiginissat naatsorsuutigaat. Tamanna mittarfeqarfinni ataasiakkaani isertitat ingerlatsinermut aningaasartuutinut angummassinnaanngimmata pisariaqarpoq, mittarfeqarfinnut nalunaarusiami allaqqavoq.

Pisorli qanoq ilungersunartiginersoq oqartussaasunit tamakkerlugu suli ilisimaneqanngilaq, tamannalu mittarfissualiornermut qanoq kinguneqarsinnaanera nalunarluni.

Tamanna misissorneqaleruttorpoq.