Mittarfiliornerit: Aningaasat asfaltimut atorneqartut inunnik isumaginninnermut atorneqarsinnaagaluarput
900 million koruunit.
Nuummi Ilulissanilu mittarfiliornerit taamak annertutigisumik ilimagisamiit akisunerussapput.
Tamanna Attaveqatigiinnermut Naalakkersuisup uggorivaa. Qaavatigullu aningaasartuutip naalakkersuisuunermini siullertut suliassarilernera aamma uggorivaa.
- Ersarippormi aningaasat asfaltimut atukkagut inunnik
isumaginninnermut ilinniartitaanermulluunniit atorneqarsimasinnaagaluartut.
- Nunatta akiitsui ukiuni makkunani annertusiartuinnartut qaffatsipaat, Naaja Nathanielsen oqarpoq.
- Nalunngilluinaqqissaarpara aningaasaliineq annertoorujussuusoq, taamaammat aaliangiinissamut tunngavitta ersareqqissaartuunissaa pingaartippara, Naaja Nathanielsen oqarpoq.
* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
* Qaqortumi nunap immikkoortuani meterinik 1500-nik takissusilimmik mittarfiliortoqassaaq.
* Mittarfissat taakku pingasuusut 3,6 milliardit koruunit missaannik akeqassangatinneqarput.
Ivertinneqarami ingerlaannaq nalunaarutit nutaat misissueqqissaarnerillu nutarsarnissaat aallartisarpai, mittarfiliortiternerup aningaasatigut aqunneqarnera qulaajarniarlugu, soorlu politikkikkut inuiaqatigiinnillu tamanna ujartorneqartoq.
Amigartoorut matuniarlugu naalagaafimmut saanniarput
Nalunaarusiaq siulleq sapaatip akunnera kingulleq saqqummerpoq, erserporlu projektimi aningaasartuutissatut pilersaarusiaq qaangingaatsiarneqarsimasoq. 900 miluunit qaavatigut pissarsiarisariaqarput, tassanilu Naaja Nathanielsen Naalakkersuisullu erseqqissumik pilersaaruteqarput.
Naalagaaffimmut Danmarkimut saaffiginninniarput projektimi amigartoorutip matussusernissaanut aningaasanik atorniaqqinniarlutik.
Ataasinngormalli KNR-imit qallunaat aningaasaqarnermut ministeriat, Nicolai Wammen (S), suliamut isummersortinniaraluarparput, tusagassiisarfianiili nalunaarput oqaaseqarusunngitsoq.
Qallunaat naalagaaffiata karsia siusinnerusukkut katillugit 900 million koruuninik atukkiipput atorniarnissamullu qulakkeerillutik, 700 million koruuninillu mittarfiliornissanut aningaasaliillutik, taamaalillunilu Qallunaat naalagaaffiata ingerlatseqatigiiffiup 33,3 procentii piginneqataaffigai.
Nunanut allanut atorniarnermut naleqqiullugu naalagaafimmut annertunerusumik atorniarneq erniakinneruvoq.
AAMMA ATUARUK Naalakkersuisut aalajangiuppaat: Mittarfiit 900 millionit koruuninik akisunerussapput
- Erniakinnerusumik atorniarnissamut periarfissagissaarneruvugut, naalagaaffillu piginneqataammat isumaqarluarpoq, Naaja Nathanielsen oqarpoq.
Atukkeeqqinnissamut naalagaaffiup piumasaqaatigisinnaasai oqaatigisinnaanngilai. Taanna sanatitsisumi Kalaallit Airportsimiippoq.
AAMMA ATUARUK Nukissiorfiit millionilikkaanik amigartoornermut: Bilimiippugut iluarsaanneqartariaqartumi
Kisianni atorniarneq inuiaqatigiinnut kinguneqanngitsoornavianngitsoq, Naaja Nathanielsenip sakkortuumik naqissuserusuppaa.
- Nunatta akiitsui ukiuni makkunani annertusiartuinnartut qaffatsipaat, Naaja Nathanielsen oqarpoq.
Mittarfiillu sinneqartooruteqalernissaata taamatullu inuiaqatigiinnut utertinnissaata neriuutiginerat atorniarnikkut kinguaatuussapput.
Taamaammat 900 millionit koruuninik akisunerusoq:
Oqartussanit sanaartornermut illunullu atatillugu piumasaqaateqartoqarnerulerneranik aningaasartuuteqarneruneq. Taakku tassaanerupput Angallannermut aqutsisoqarfimmit avatangiisinut piumasaqaatinut sukannernerusumillu piumasaqaateqarneq.
Nalunaajaat naapertorlugu piumasaqaat taanna ”missingersuusiarineqaqqaartumi ilisimaneqarsinnaasimanngilaq, piumasaqaat pilersaarutip inaarsarneranut atatillugu aatsaat paasineqarmat”.
Mittarfinni illut aallaqqaammulli suliniutip ilaaniipput. Misissingersuutilli naammanngitsut paasineqarpoq. Nalunaajaat naapertorlugu ”illut mittarfiup nalinginnaasumik ingerlanneqarnissaanut nunallu tamalaat akornanni angallannermik aqutsinissamut tunngatillugu pisariaqartut pineqarput. Tamatuma saniatigut pilersaarutigineqaqqaartumut inersuarmik sanaartortoqarnissaa ilanngunneqarpoq."
Katillugit 747, 2 millionit koruunit.
Tamatuma saniatigut ingerlatsinermut aningaasartuutit: 142,5 millionit koruunit.
Aamma saniatigut aningaasaliinermut aningaasartuutit: 6 millionit koruunit.
Katillugit: 895,7 millionit koruunit.
Qanoq sivisutigissanersoq akisinnaanngikkallarpaa. Misissueqqissaarnerit takutikkumaarpaat.
- Taakkulu aningaasat (sinneqartoorutit, aaqqiss.) inuiaqatigiinni allatigut atortussaagaluarpagut, mittarfiliornerunngitsumut. Umiarsualivik heliportiluunniit aaliangersimasoq eqqorneqassanersoq oqaatigisinnaanngikkallarpara. Imaaginnarpoq allanut aningaasaliinissarput annikillisippaa, nassuiaavoq.
Taamatuttaaq inunnik isumaginninnerup ilinniartitaanerullu iluani.
Aningaasaqarnermut Siunnersuisoqatigiit: Siunissamut pilersaarusiortoqassaaq
Naaja Nathanielsenip oqarneratuut nunap akiitsui annertusiartorput. Malitsigisaanillu kinguaariit arlaqartut ukiuni aggersuni soraarninngortussaammata, utoqqarnut aningaasartuuteqarnerulernissaq avaqqunneqarsinnaanngilaq. Soorlu aamma inuunertunerulernitsigut sivisunerusumik inuiaqatigiit pisariaqartinnerussagigut.
Aningaasaqarnermut Siunnersuisoqatigiit siulittaasuata Torben M. Andersenip KNR-imut erseqqissarpaa, politikerit qanoq ilillutik 900 milliuunit matussuserniaraluarunikkit, siunissamut ungasissumut eqqarsartoqartariaqartoq.
- Siunissaq ungasinnerusoq eqqarsaatigalugu pilersaarusiornissaq pingaaruteqarpoq, aningaasartuutillu taamatullu annertunerusumik atorniartariaqalerneq aamma eqqarsaatigalugit, KNR-imut allappoq.
Landskarsip aningaasartuutaasa ilaat siunissami aamma qaffannissaat pingaartumik eqqarsaatigalugit.
- Aningaasaqarnerup siumungaaq pilersaarusiornerani utoqqaat arlaqarnerulernerat, corap nalaani aningaasartuutit, mittarfiliornerit aamalu attaveqarnermut sanaartugassat allat aqussinnaaneqartussaapput, taama allappoq.
Naqqiut: Qallunaat naalagaaffiata 1,6 milliardit koruuninik atukkiillunilu atukkiinissamut qulakkeerinnissimasoq ilanngutassiami siullermi allaqqavoq. Eqqortorli unaavoq, Qallunaat naalagaaffia 900 millionit koruuninik atukkiillunilu atukkiinissamut qulakkeerinnissimammat, saniatigullu 700 millionit koruuninut 33,3 procentimik piginneqataanissamik akiliisimalluni.
