Naalakkersuisut aalajangiuppaat: Mittarfiit 900 millionit koruuninik akisunerussapput
Nunatta mittarfissuarnit nutaanit marlunnit Nuummi Ilulissanilu sanaartorneqartunit aningaasanik iluanaaruteqarnissaannut piffissaq sivisunerussaaq.
Mittarfinnik sanaartorneq 900 millionit koruuninik ilimagisamit akisunerussasoq Naalakkersuisut nalunaajaataanni nutaami aalajangiunneqarpoq.
Nalunaajaat Inatsisartuni tallimanngornermi ullaap tungaani saqqummiunneqarpoq.
AAMMA ATUARUK Mittarfiit: 900 millionit koruuninik atorniarusunneq partiinik ernumalersitsisoq
Nunatta oqaluttuarisaanerani sanaartornermi annerpaaq milliardit koruuningajannik akisunerulernera marlunnik pissuteqarpoq: Oqartussanit piumasaqaateqartoqarnerulernera pissutigalugu sanaartornermut aningaasartuutit qaffasinnerulerput. Taakku tassaanerupput Angallannermut aqutsisoqarfimmit avatangiisinut piumasaqaatinut sukannernerusumillu piumasaqaateqarneq.
Taavalu mittarfiit illutassai naatsorsuutigisamit akisunerulerput.
Tamanna pissutigalugu nunarput sanaartornermik ingerlatsisoqaannarnissaa pissutigalugu aningaasanik atortariaqarpoq. Tamanna kinguneqaataassasoq, Naaja Nathanielsen KNR-imit apersorneqarnermini oqarpoq.
* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
* Qaqortumi nunap immikkoortuani meterinik 1500-nik takissusilimmik mittarfiliortoqassaaq.
* Mittarfissat taakku pingasuusut 3,6 milliardit koruunit missaannik akeqassangatinneqarput.
- Nunatta karsia taamaalilluni toqqaannartumik tamaviaartinneqassanngilaq, kisianni toqqaannanngitsumik tamaviaartinneqarnissaa qularnanngilaq. Nunatut akiitsutta annertunerulernerani aamma sanaartortitsisup KAIR-ip nammineq akiitsoqarnerulernerani eqaassutsimik annaasaqalaassaagut.
- Inuiaqatigiittut iluanaaruteqalernissatsinnut piffissaq sivisunerussaaq, naalakkersuisoq oqarpoq.
Danmarkimit aningaasanik atorneq?
Naalakkersuisut aningaasaliinissamut qulakkeerinissamut marlunnik maanna sulissuteqarput. Tassa Danmarkimit imaluunniit nunanit allanit aningaasanik atortoqarsinnaavoq.
Tassa imaappoq Nationalbanken aqqutigalugu atortoqarsinnaanersoq misissorneqaleruttorpoq – taamaattoqarsinnaanngippallu Naalakkersuisut taarsigassiisarfinniit atorniarniarput.
AAMMA ATUARUK Ilisimatuut: Mittarfissuassat atulerpata Kalaallit Nunaata aningaasaqarneranut iluaqutaassapput
Nationalbanken aqqutigalugu taarsigasseeqqinnertut tamanna pissanersoq naalagaaffimmut isumaqatigiissut aalajangiisuussaaq. Aningaasaqarnermut ministereqarfik oqalliseqatigineqaleruttorpoq, ukiartinnagulu aalajangiisoqarnissaa naatsorsuutigineqartoq, nalunaajaammi allassimavoq.
- Kalaallit Airport International danskit naalagaaffiat peqatigalugu pigaarput, taamaammat naalagaaffik aqqutiglaugu taarsigassarseqqissinnaanermut periarfissaqarluta, Naaja Nathanielsen oqarpoq.
Taamaammat 900 millionit koruuninik akisunerusoq:
Oqartussanit sanaartornermut illunullu atatillugu piumasaqaateqartoqarnerulerneranik aningaasartuuteqarneruneq. Taakku tassaanerupput Angallannermut aqutsisoqarfimmit avatangiisinut piumasaqaatinut sukannernerusumillu piumasaqaateqarneq.
Nalunaajaat naapertorlugu piumasaqaat taanna ”missingersuusiarineqaqqaartumi ilisimaneqarsinnaasimanngilaq, piumasaqaat pilersaarutip inaarsarneranut atatillugu aatsaat paasineqarmat”.
Mittarfinni illut aallaqqaammulli suliniutip ilaaniipput. Misissingersuutilli naammanngitsut paasineqarpoq. Nalunaajaat naapertorlugu ”illut mittarfiup nalinginnaasumik ingerlanneqarnissaanut nunallu tamalaat akornanni angallannermik aqutsinissamut tunngatillugu pisariaqartut pineqarput. Tamatuma saniatigut pilersaarutigineqaqqaartumut inersuarmik sanaartortoqarnissaa ilanngunneqarpoq."
Katillugit 747, 2 millionit koruunit.
Tamatuma saniatigut ingerlatsinermut aningaasartuutit: 142,5 millionit koruunit.
Aamma saniatigut aningaasaliinermut aningaasartuutit: 6 millionit koruunit.
Katillugit: 895,7 millionit koruunit.
- Periarfissap aappaani taarsigassiisarfiit nalinginnaasut aqqutigineraniippoq, tassanilu periarfissat aamma misissorneqarput. Periarfissat marluk isertuanngissuseqarfigineqarlutillu piumaneqarput.
Nutaamilli atoqqittariaqarneq ilungersunartoq, naalakkersuisoq naliliivoq. Suliniummulli atatillugu taarsigassarsisinnaanissaq ilungersunarpallaanngilaq.
- Kisianni taakkunannga (mittarfinnit aaqq.) iluanaaruteqalernisssaanissatsinnut periarfissanut sunniuteqarnera pissutigalugu ilungersunartuusoraara, Naaja Nathanielsen oqarpoq.
Sanaartornerit unissanngitsut
Assersuutigalugu Mittarfeqarfinnut nunatta sinnerani mittarfinnik ingerlatsisunut sunniuteqassaaq. Taakku imminut akilersinnaanngillat.
- Taakkunani amigartoorutit imminut akilersinnaasunit sinneqartooruteqarnermik matussusiisarpugut. Taamaammat sunniuteqarpoq, taamaammallu tassani qanoq matussusiinissamik misissuissaagut.
AAMMA ATUARUK Justus Hansen: Mittarfissualiornernut aningaasaqarnermik aallaqqaataaniilli aqutsinerluttoqarpoq
Tamannali mittarfiit ilaasa matunissaanik pissuteqanngilaq. Sua tamarmi qanoq ingerlasinnaanersoq politikerit maanna misissuinissaannut tunngavoq.
IA Nalerarlu naalakkersuisoqatigiinnissamik isumaqatigiissuteqarmata Naalakkersuisut mittarfinnik sanaartornermut atatillugu ataatsimut isiginnissinnaalerniartut allassimavoq. Tassannga paasisaq ullumi saqqummiunneqarput.
Inatsisartut suliamut maanna ilanngutitinneqassapput. Maannakkutut isikkoqartillugu tamanna Ilulissani Nuummiluunniit sanaartornermut atatillugu allannguisoqassanngilaq.
Naaja Nathanielsenillu Qaqortumi mittarfissap suliariumannittussarsiuunneqartup qanoq pinissaa maanna aamma oqaaseqarfigisinnaanngilaa.
