Ilisimatuut: Mittarfissuassat atulerpata Kalaallit Nunaata aningaasaqarneranut iluaqutaassapput

Nuummi Ilulissanilu mittarfiit tallineqarpata, Qaqortumilu nutaamik mittarfiliortoqarpat, Kalaallit Nunaata aningaasaqarneranut kingunerisinnaasai ilisimatuut naatsorsorsimavaat.

Naatsorsuinerisalu inernerat paatsuugassaanngilaq: Mittarfissuassat atulerpata inuiaqatigiit aningaasaqarneranut iluanaarutaassapput. Suliffinnik nutaanik pilersitsissapput takornariaqarnerlu uummarissarneqassaaq.

- Timmisartut ingerlaarfigisartagaannik nutaanik pilersitsisoqarpat assersuutigalugu Canadap USA-illu kangisinnerusortaanut niuernikkut attavinnik amerlanerusunik takornarianillu nutaanik tikittoqartalersinnaavoq. Takornariaqarneq ineriartortinneqarnerusinnaavoq, suliffeqarfiillu nunarsuarmi tamarmi ingerlataqartut amerlanerusut Kalaallit Nunaanni aallartitsisinnaapput, ilisimatooq soraarneq Linda Christensen oqarpoq. 

Kalaallit Nunaannit tuniniaasoqartariaqartoq

Mittarfiilli atorneqartarnissaat iluatsissapata, Kalaallit Nunaannit annertuumik iliuuseqarnissaq piumasaqaataavoq.

- Taamaaliortoqassappallu timmisartuutileqatigiiffiit mittarfinnik atuinissaat piumaaqaataavoq. Iluaqutaanavianngilarmi mittarfiliortoqariarluni susoqarnissaa utaqqissallugu. Assersuutigalugu Spaniami Madridip kujasinnerusortaani ukiut arlallit matuma siornatigut mittarfissualiortoqaraluartoq tassunga nunnittoqarneq ajormat matuneqartariaqarsimavoq, milliardinik arlalippassuarnik aningaasaliiffigineqarsimagaluarluni, Linda Christensen oqarpoq.

AAMMA ATUARUK Qaqortumi mittarfissamik suliariumannittussarsiorneq aallarteqqittoq

Taamaammat mittarfiit nutaat nunarsuarmioqatitsinnit atorneqarnissaat qulakkeerumallugu Kalaallit Nunaannit annertuumik tuniniaasoqartariaqartoq, taanna erseqqissaavoq. 

- Niuernermik suliaqartoqartariaqarpoq. Mittarfiimmi kisimik tuniniarneqarnavianngillat. Kalaallit Nunaat ornitassatut tuniniarneqartariaqarpoq timmisartumik tikinneqartarnissaa anguniaraanni.

Linda ilisimatuut allat sisamat suleqatigalugit mittarfiit tallineqarpata Kalaallit Nunaata aningaasaqarneranut kingunerisassai misissuiffigaat. Misissuinerisa inernerat ilisimatuussutsikkut allaaserisatut saqqummiunneqarpoq, atuagassiamilu nunarsuarmi tamarmi saqqummersinneqartartumi Research in Transportation Economicsimi ilanngunneqarluni.

Coronavirusi nunarsuaq tamakkerlugu suli tunillaassuutilinngitsoq misissuipput, taamaammallu coronavirusip ajornartoortitsinerata timmisartuussinernut sunniutai naatsorsuinerminni ilanngutinngillaat. 

Mittarfiit ilaneqarneri ukiualuit qaangiuppata naammassineqassasut

Nuummi mittarfiup ilaneqarnera ukioq 2023-ip naalernerani naammassineqarnissaa naatsorsuutigineqarpoq, Ilulissanilu mittarfiup ilaneqarnera ukioq 2024-ip ingerlanerani naammassineqarnissaa naatsorsuutigineqarluni.

AAMMA ATUARUK Mittarfissuassanut siulittaasoq tunuartoq

Qaqortumi qaqugu mittarfiliortoqassanersoq suli ilisimaneqanngilaq.

Mittarfiliornissamut pilersaarut siorna ukiakkut unitsinneqarallarpoq, januaarillu qaammataani nutaamik suliariumanittussarsiuussisoqarluni.