Mittarfissuassanut siulittaasoq tunuartoq

Kalaallit Airports Groupip nunatsinni mittarfissuassanut siulersuisuisa siulittaasuat, Jóhannus Egholm Hansen, tunuarpoq.
Jóhannus Egholm Hansen, Kalaallit Airports Holding A/S-ip siulersuisuisa siulittaasuattut, tunuarpoq. Assi © : Kalaallit Airports
Allattoq Helle Nørrelund Sørensen
oktobarip 01-at 2020 11:37
Nutserisoq Hanne Petersen

Jóhannus Egholm Hansen Kalaallit Airportsip siulersuisuisa siulittaasuattut tunuarpoq. 

Tunuarnissani nammineq aalajangersimagini, inoqatinut attaveqaatit ilaanni LinkedInimi allappoq. 

- Kalaallit Airports Groupip siulersuisuisa siulittaasuattut ullumi tunuarnera nammineq aalajangerpara.

Taanna ingerlatseqatigiiffiup Kalaallit Airports A/S-ip, Namminersorlutik Oqartussanit 2016-imi pilersinneqartup, siulersuisuini 2017-imi marsimili siulittaasuuvoq.

AAMMA ATUARUK Nunatsinni mittarfinni tamani utaqqisarfinnut iserniartunik nakkutilliisoqartalertoq

Savalimmiormiu inuussutissarsiortoq, Jóhannus Egholm Hansen Nuummi, Ilulissani Qaqortumilu mittarfissualiornissanik naqqaniit pilersaarusiornerup aallartinneraniilli siuttuuvoq.

- Pilersaarutit malillugit mittarfissuassani pingasuni maannamut marluk sanaartorneqaleruttortut pillugit ineriartortitsinerni, suliariumannittussarsiuussinerni, isumaqatigiissusiornerni sanaartorneqarnerinillu aallarniinerni taakkualu aningaasaliiffigineqarnissaannik qulakkeerinninniarnermi pingaarnertut atuuffeqarlunga suleqataanera nuannaarutigeqaara, Jóhannus Egholm Hansen LinkedInimi allappoq.

Qaqortumi 1.500 meteritut takitigisumik mittarfiliornissaraluamut suliariumannittussarsiuussineq taamaatinneqareersorlu tunuarpoq.

Suliarinnikumasut tamarmik Kalaallit Airportsip mittarfiliornissamut missingersuutai sipporlugit neqeroortuteqarsimammata, Qaqortumi mittarfiliornissaraluamut suliariumannittussarsiuussineq taamaatinneqarpoq.

AAMMA ATUARUK Tusagassiuut: Qaqortumi mittarfissaq ilimagisamit naannerussaaq

Naannerusumilli tassa 1.199 meteritut takitigisumik Qaqortumi mittarfiliornissaq Jóhannus Egholm Hansenip siunnersuutigisimagaa, Sermitsiaq.AG allappoq.

Kujataamiulli, aamma Kommune Kujalliup borgmesteria, Kiista P. Isaksen, tamatumunnga akerliusorujussuupput.

Nunarpulli siunertanut maannamut aatsaat taama pitsaatigisunut aningaasaliisoq, siulittaasutut tunuartoq LinkedInimi allappoq.

Jóhannus Egholm Hansenip tunuarnini KNR-imut oqaaseqarfigerusunngilaa.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk