Tusagassiuut: Qaqortumi mittarfissaq ilimagisamit naannerussaaq
Qaqortumi mittarfissaq 1500 meteritut takissuseqarani 1199 meteritut takussuseqarataannaavoq.
Sermitsiaq.AG, Kalaallit Airportsip siulersuisuisa siulittaasuata Jóhannus Egholm Hansenip Namminersorlutik Oqartussallu mailikkut allagaannik pissarsisimasoq, taama allappoq.
* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
* Qaqortumi nunap immikkoortuani meterinik 1500-nik takissusilimmik mittarfiliortoqassaaq.
* Mittarfissat taakku pingasuusut 3,6 milliardit koruunit missaannik akeqassangatinneqarput.
Qaqortumi mittarfiliortoqassappat naannerusumik mittarfiliortoqartariaqartoq pillugu Sermitsiaq.AG allappoq.
AAMMA ATUARUK Qaqortumi mittarfiliornissamut suliariumannittussarsiuussineq taamaatiinnarneqartoq
- Namminersorlutik Oqartussat 1.500 meteriunngitsumik naannerusumilli tassa 1.199 meterimik mittarfiliulersaarneq itigartitsissutigisimagaluarpassulluunniit, isumaqarpunga aningaasartuutissat kissaatigineqartutut ikilisinneqarnissaat periarfissatuaasoq, Jóhannus Egholm Hansen Namminersorlutik Oqartussanut mailikkut allappoq. Allakkat taakkua Sermitsiaq:AG-ip pissarsiarisimavai.
Suliariumannittussarsiuussineq taamaatittoq
Qaqortumi mittarfiliornissamut suliariumannittussarsiuussineq Namminersorlutik Oqartussat ingerlatseqatigiiffiutaata, Kalaallit Airportsip, aggustimi taamaatippaa.
Ingerlatseqatigiiffit tallimat suliariumannikkumasimapput. Taakkuli Kalaallit Airportsip missingersuutai sipporujussuarlugit neqerooruteqarsimapput. Qanoq sippuisimatiginersut, suliniutinut pisortap Aviaaja Knudsenip ilisimatitsissutigerusussimanngilaa.
Taamaammat Kalaallit Airportsip suliariumannikkumasimasuni tallimaasuni marluk suliniummi sipaaruteqarnissamut isumaqatigiissuteqarfiginiarsimagaluarpai.
AAMMA ATUARUK Kommune Kujalleq: Naalakkersuisuniit mittarfimmut atatillugu uupakaasiarineqarpugut
Kalaallit Airportsilu suliariumannikkumasut neqeroorutaannut akisuunut matussusiissutissanik Namminersorlutik Oqartussanit aamma aningaasaliiffigeqqeqqusimagaluarpoq. Iluatsinngitsumilli.
Taamaammat Kalaallit Aiports aappaagu suliariumannittussarsiuusseqqinniarpoq.
Kalaallit Airportsip siulersuisuisa siulittaasuat nammineq aalajangiissasuuguni siusinnerusukkut suliariumannittussarsiuunneqareersumit naannerusumik mittarfiliornissamut suliariumannittussarsiuussisoqassaaq.
