Kommune Kujalleq: Naalakkersuisuniit mittarfimmut atatillugu uupakaasiarineqarpugut
- Tusagaq alianarpoq, pakatsinaqaarlu, Kiista P. Isaksen tusagassiuutinut nalunaarummi oqarpoq.
Kalaallit Airportsip Qaqortumi mittarfiliornissamut suliariumannittussarsiuussinermik sisamanngornermi taamaatitsiinnarnera pissutigalugu taama oqarpoq.
AAMMA ATUARUK Qaqortumi mittarfiliornissamut suliariumannittussarsiuussineq taamaatiinnarneqartoq
Ingerlatseqatigiiffiit tallimat suliniummut suliumannittussarsiuussinermi neqerooruteqarput, neqeroorutilli tamarmik Kalaallit Airportsip missingersuutaanit qaffasinnerungaatsiarput. Suliniutinut pisortap, Aviaaja Knudsenip qanoq akisunerutiginerat paasissutissiissutigerusunngilaa.
Mittarfiliortiterneq
* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
* Qaqortumi nunap immikkoortuani meterinik 1500-nik takissusilimmik mittarfiliortoqassaaq.
* Mittarfissat taakku pingasuusut 3,6 milliardit koruunit missaannik akeqassangatinneqarput.
Kalaallit Airportsip suliariumannittussarsiuussinermi neqerooruteqartut suliniummi sipaarniartoqarnissaanut isumaqatiginiaraluarpai. Tamatumalu saniatigut neqeroorutinut akisuunut Namminersorlutik Oqartussanit matussusiisoqarnissaanut neriuuteqaraluarluni.
Iluatsinngilarli. Tassungalu taarsiullugu Kalaallit Aiportsip suliniutip aappaagumut suliariumannittussarsiuunneqarnissaa misilinniarpaa
Akuersaarneqarsinnaananilu paasissaanngitsoq
Sulisitsisut Qaqortumi immikkoortortaqarfiani siulittaasup tulliata, Jim Riisip suliariumannittussarsiuunnerup taamaatiinnarneqarnera kamaatigaa. Borgmesterillu pakatsinini maanna aamma oqaatigaa.
- Tamanna akueriuminaappoq paasiuminaallunilu, Kiista P. Isaksen oqarpoq.
- Neqerooruteqartut tallimaasut tamarmik akisuallaartumik neqerooruteqarsimassapput, tamannalu projektiliortut ajorluinnartumik suliaqarsimanerannut ersiutaavoq
- Naalakkersuisut pilersaarutaasumik amigartunik aningaasaliissuteqarsimapput, taamaassimassappat uggornarpoq tamannami Kommune Kujallermi akisunaartussanngorparput.
AAMMA ATUARUK Sulisitsisut suliariumannittussarsiuussinerup taamaatiinnarneqarnera kamaatigaa: Tillutsittutut misigisimanarpoq
Borgmesterip Naalakkersuisut Qaqortumi mittarfiliornissamut suliariumannittussarsiuussinerup ajutoorneranut pisuutippai, partiimilu siulittaasuminut Kim Kielsenimut maanna tatiginnikkunnaarluni.
- Maannami killiffitsinni Naalakkersuisunit uupakaasiarineqartutut suusupagisaasutut misigineq allaat tatiginnikkunnaarnermik malitseqarpoq, Kiista P. Isaksen oqarpoq.
Borgmesterip tullersortaa tapersiisoq
Kommune Kujallermi borgmesterip tullersortaa siulleq, Simon Simonsen (Siumut) aamma pakatsingaatsiarpoq. Taanna kommunip inuussutissaqarnermut ataatsimiititaliaani aamma siulittaasuuvoq.
Taannami Qaqortumi mittarfiliornissaq pilersaarut malillugu ingerlajumaartoq Kim Kielsenimit neriorsorneqarsimalluni oqarpoq.
- Ajoraluartumik nassuerutigisariaqarpara Naalakkersuisunut tatiginnikkunnaarlunga, Simon Simonsen tusagassiuutinut nalunaarummi oqarpoq.
Taassumalu Qaqortumi mittarfiliornissamut suliniummut missingersuutit neqeroorutaasunik qanoq qaangerneqartiginerat paaserusuppaa.
- Piffissami kingullermi sivitsulersumi Kommune Kujallermi inuerukkiartornermik nalaassaqarfiusumi isumallualeraluarnerup tassanngaanaq unitsinneqarnera neriuutigeqaara Inatsisartut Naalakkersuisullu suleqatigiilluinnarutik piaarnerpaamik uterteqqinneqarnissaa suliarissagaat naammassillugu akisussaasuseqarlutik, Simon Simonsen oqarpoq.