Sulisitsisut suliariumannittussarsiuussinerup taamaatiinnarneqarnera kamaatigaa: Tillutsittutut misigisimanarpoq

Qaqortumi inuussutissarsiortut mittarfinnik sanaartornissap suliarinnittussarsiuunneqarunnaarnera pakatsissutigaat. Sulisitsisut immikkoortortaqarfiata siulittaasuata tullia neriutaaruppoq.
- Mittarfittaarnissamut oqallinnermi ukiuni 20-nngulersuni peqataavunga, ataasiarlungaluunniit neriuutaarussimanngisaannarpunga, ullaarli tusakkannik neriuutaaruppunga. Mittarfittaarnissaq ilimangiunnaarpara, Jim Riis oqarpoq. Assi © : KNR / Jørgen Semionsen
aggustip 21-at 2020 07:24

- Naakkut tillutsittutut misigisimanarpoq. Mittarfimmik ukiorpassuarni neriorsorneqarpugut. Siunissamik pitsaasumik isiginninniarneq maannakkut ajornakusoorpoq.

Sulisitsisut Qaqortumi immikkoortortaqarfiani siulittaasup tullia, Jim Riis oqarpoq.

Kalaallit Airportsip Qaqortumi mittarfimmik sanaartornisssaq unitsikkallarpaa. Suliniummi naatsorsuutigisamit akisunerungaatsiarpoq.

Mittarfiliortiterneq

* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.

* Qaqortumi nunap immikkoortuani meterinik 1500-nik takissusilimmik mittarfiliortoqassaaq.

* Mittarfissat taakku pingasuusut 3,6 milliardit koruunit missaannik akeqassangatinneqarput.

Kalaallit Airportsip suliariumannittussarsiuussinermi neqerooruteqartut suliniummi sipaarniartoqarnissaanut isumaqatiginiaraluarpai. Tamatumalu saniatigut neqeroorutinut akisuunut Namminersorlutik Oqartussanit matussusiisoqarnissaanut neriuuteqaraluarluni.

Iluatsinngilarli. Tassungalu taarsiullugu Kalaallit Aiportsip suliniutip aappaagumut suliariumannittussarsiuunneqarnissaa misilinniarpaa.

Sulisitsisut Qaqortumi immikkoortortaqarfiani siulittaasup tullia, Jim Riisip suliariumannittussarsiuunnerup taamaatiinnarneqarnera tusaramiuk nuannaanngilaq:

- Ilumuunngitsoq aallaqqaammut eqqarsarpunga. Mittarfimmi qangali oqallisaalerpoq. Qaqortoq Kalaallit Nunaanni illoqarfinni mittarfimmik amigaatilittatuaavoq, siulittaasup tullia oqarpoq.

- Illoqarfinni angallannerni ajornarpaavoq aaqqiivigineqartariaqarlunilu. Sakkortuvoq, soqutigineqanngitsutullu isikkoqarluni, siulittaasup tullia, Jim Riis KNR-imut oqarpoq.

Nutaamik 2021-mi suliariumannittussarsiuussisoqassappat mittarfiup 2024-mi piareersimanissaa naatsorsuutaavoq. Tamanna pilersaarummit ukiumik ataatsimik kingusinneruvoq.

Qaqortumi inuussutissarsiortut piareersarsimapput – aamma ajornerusumut

Qaqortumi inuussutissarsiortut mittarfiup sanaartulerneqarnissaanut qilanaarsimagaluarput, mittarfiulli sanaartorneqarsinnaalernissaanut minnerpaamik ukioq ataaseq utaqqeqqittoqartariaqarpoq.

- Ulloq alianarpoq, pisoqalernissaanummi ukiorpassuarni piareersartoqarpoq, Jim Riis oqarpoq.

- Inuussutissarsiortunik ammut ingerlaleraluarlutik mittarfittaartussanngorneq pissutigalugu ineriartortoqalertussaammat maaniiginnarniarsimasunik peqarsimavoq. Aningaasaliisimasoqarpoq, assersuutigalugu sanaartornermik suliaqartartut mittarfimmik sanaartornissamut maskiinanik pisiortorsimasoqarpoq.

Jim Riis Hotel Qaqortumik piginnittuuvoq. Taassuma Qaqortumi mittarfeqalernissaa piffissami sivisuumi takorloorsimavaa. Mittarfeqalernerani kujataani takornariarpassuit taassuma akunnittarfiutaani unnuisalersussat takorloorsimavai. Ullumili taakku suujunnaarput.

- Mittarfittaarnissamut oqallinnermi ukiuni 20-nngulersuni peqataavunga, ataasiarlungaluunniit neriuutaarussimanngisaannarpunga, ullaarli tusakkannik neriuutaaruppunga. Mittarfittaarnissaq ilimangiunnaarpara.

Borgmesteri: Pakatsisorujussuuvunga

Kommune Kujallermi borgmesterip, Kiista P. Isaksenip nutaarsiassaq tusakkani aamma nuannaarutiginngilaa.

- Tusarparput suliariumannittussarsiuussineq aallaqqaataaneertariaqartoq, tusagaq pakatsinartorujussuuvoq. Annerusumilli isummersorsinnaanngikkalarpunga pisortatigoortunik allakkanik suli tigusaqannginnatta, pakatsisorujussuuvungali, borgmesteri oqarpoq.

KNR-ip borgmesteri apersorniaraluarpai, tamannali iluatsissimanngilaq.

Mittarfiliornermik suliniuteqarneq nunatta oqaluttuarisaanerani attaveqatigiinnermut aningaasaliissutini annerpaatut isigineqarpoq.

Suliniutip ilaa danskit naalagaaffiata suleqatigineratigut aningaasaliiffigineqarpoq.

Danmark 700 millionit koruuninik tapersiissuteqarnissaa isumaqatigiissutaavoq. Tamanna danskit naalagaaffiata timmisartuussivilereqatigiiffimmut 33,3 procentimik piginnitsitsilerpoq.