Naalakkersuisut Qaqortumi mittarfimmit allamik qinigassaqarnissamut periarfissaqartitsisut

Mittarfissualiornissamut aningaasaliinernut misissuisoqaleruttortoq Naalakkersuisunit nalunaarusiami allaqqavoq.

Qaqortumilu mittarfimmit allanik periarfissaqarnersoq eqqarsaatigaat.

- Qaqortumi mittarfiliornissaq pillugu aalajangiinerup allanngortinneqarnissaa Inatsisartut kissaatigippassuk, Narsarsuarmi mittarfiup iluarsaannissaanut 186 millionit koruunit atorneqassasut naatsorsuutigineqarpoq, nalunaarusiami allaqqavoq.

AAMMA ATUARUK Qaqortumi mittarfittaarnissaq akunnittarfiutillip upperiunnaarpaa

Naalakkersuisut qanoq iliuuseqarusunnersut suli akissutissarsineqanngilaq. Tamanna attaveqatigiinermut naalakkersuisup, Naaja Nathanielsenip, KNR-imut oqaatigaa.

- Politikerit isummereersut ataqqivakka, aalajangiissagumali naatsorsuutiliareqqunikuusakka takoqqaarusuppakka. Ersarissumik massakkut nalunaaruteqarsinnaannginnerma kipiluttunarsinnaanera paasilluarpara, taanna oqarpoq.

Pilersaarutaareersut neriuuteqarfigineqartariaqanngitsut

Mittarfiliassanulli siunissami susoqassanersoq tunngatillugu pissutsit allanngorsimatillugit pioreersut attanniarsariinnarnissaat iluaqutaanngitsoq, Naaja Nathanielsen isumaqarpoq.

- Piviusoq allanngorsimappat, ukiut marluk pingasulluunniit siornatigut atukkat tunngavigisinnaanngilagut. Nunarsuarmilu ukiuni kingullerni allanngortoqangaatsiarsimanera paasinarsereerpoq. Covid-19-ip nunarsuaq tamakkerlugu tunillaasuunnera peqqinnissamut aarlerinaateqarpoq, kisianni aamma pilersuinissamut sanaartornermilu akinik qaffaanernik sulinitsinnut ilannguttariaqakkatsinnik kinguneqarpoq, Naaja Nathanielsen oqarpoq.

Aalajangiisinnaanissanut suut amigaatigaagit?

- Misissueqqissaarnerit marluk aallartitinnikuusakka amigaatigaakka. Siulleq Deloittep nalunaarusiaanut 2018-meersumut nutarsaaneruvoq, misissuinermilu aappaani Qaqotumi mittarfissaq pillugu nalunaarusianik kinguneqassaaq, taassumalu naammassinissaanut ulapittoqarpoq. Naammasseriilersimariarpata annerusumik oqaaseqarsinnaanissara neriuutigaara.

Paasissutissat suunuku amigaatigigitit?

- Naatsorsuinermut tunngavissat nutaat, tamannalu annerusumik maannakkut oqaaseqarfigisinnaanngilara. Naammassippatali kinguarsaanaviarnanga neriorsuutigisinnaavara.

Amigartooruteqarfiussaaq

Qaqortumi mittarfissaq amigartooruteqarfiussasoq nalunaarsusiami allaqqavoq. Taamaattumillu suliniut nunatta avataaniit aningaasaliisussarsineqarsimasinnaanngilaq.

- Tamanna pissutigalugu Inatsisartut aalajangiipput, mittarfissaq Nunap Karsianiit aningaasalersorneqassasoq, allaqqavoq, nalunaarusiami allaqqavoq.

Suliniut marloriarlugu suliarinnittussarsiuunneqareerpoq, sanaartortartuniilli neqeroorutigineqarsimasut tamarmik missingersuutini aningaasartuutissatut atugassat Kim Kielsenip Naalakkersuisut siuttuuffigisaannit isumaqatigiinniutigineqartunit sinngersimavaat.

AAMMA ATUARUK Mittarfiliornerit: Aningaasat asfaltimut atorneqartut inunnik isumaginninnermut atorneqarsinnaagaluarput

Naalakkersuisut mittarfiup atulernissaata tungaanut aningaasartuutissat naatsorsuutin ilanngunneqarsimannginneri tamatumunnga pissutaaqataasorujussuupput.

Tamatumalu saniatigut Ilulissani Nuummilu mittarfiliornermi aningaasartuutit qaavatigut milliardingajammik ilanikuupput.