Qaqortumi mittarfittaarnissaq akunnittarfiutillip upperiunnaarpaa
- Upperiunnaavippara, naamerluinnaqqinnaaq. Upperivarput ukiut 40-t, aggiliivippoq aqaguagu aggiliivippoq.
Heidi Møller taama oqarpoq, taanna akunnittarfimmi Siniffik Inn-imi piginnittuuvoq. Taanna Qaqortumi mittarfissap naammassineqarnissaanut unnuisussaqarnerulernissaminut isumalluaraluarpoq.
Qaqortumi mittarfiliornissamut atatillugu Naalakkersuisut suliniummut misuissueqqinniarlutik aalajangerput.
Mittarfiliortoqarnissaanullu aningaasaliissutit annikippallaartut Naalakkersuisut sapaatit akunnerata siuliani nalunaarutigaat.
Takornarialeriffimmik Greenland Sagalandimik piginnittoq Pitsi Høegh aamma killiffimmut pakatsivoq.
- Imaannaanngitsorujussuarmik pakatsivugut aamma miserratigisinnaanngilara kamappugut, Siumut sinnerlugu qineqqusartoq, Pitsi Høegh oqarpoq.
Siunissaq nalorninartoq
Qaqortumi mittarfissaq qanorpiaq pineqarniarnersoq suli erseqqinngilaq. Misissuisoqareeriarpallu aatsaat naalakkersuisut mittarfissaq isummerfiginiarlugu aalajangerput.
Ataaserli taamaallaat ilisimaneqarpoq: Mittarfik marloriarlugu maanna suliariumannittussarsiuunneqareerpoq sulilu aningaasaliissutaasunit akisuallaarluni.
Tamannalu kujataani takornarialerisunit pakatsissutigineqaqaaq.
- Kamannartorujorujussuuvoq ukiut taamannanik pikinikuulluta, taavalu aamma ingammik ukiuni kingullerni aningaasaliiffigineqarneraninngaanniit, nuannaarnerit, pikinerit, siunissamut isumalluarnerit, nutaanik misigisassanik sananerit.
- Angallatinut investererpugut taavalu aamma unnuisarfinnut investererpugut, allaannginnami taakku investeringit asuli pisimagipput, Pitsi Høegh taama oqarpoq.
AAMMA ATUARUK Qaqortumi mittarfiliornissaq qimerluualaarneqaqqilersoq
Mittarfiliornissamut nutaamik misissuisoqaqqinniarnera, Heidi Møllerip tupigusuutigaa:
- Kisitsisit misissuisut, naammattorsuarnik misissuinermut aningaasaliinikuullutik aamma misissuinermut aamma atoqqinneqassappata, sunaana taama ajornartorsiut taama angitigisoq uagut ilisimanngikkipput. Immaa oqaannartariaqaraluarput, tassa tassaniinniarli pisaarnavianngilasi, Heidi Møller, Nauja Møllerimut oqarpoq.
Kommuni Kujallermi aamma naammagittaqqissinnaajunnaarparput.
MAannamut aningaasaliissutit mittarfimmut aallarniutaasinnaasut, Siumut sinnerlugu Kommunalbestyrelsimut ilaasortaq Simon Simonsen isumaqarpoq. Ukiunilu tulliuttuni aningaasaliissutissanik allanik ujartuisoqarsinnaasoq taanna isumaqapoq.
