Qaqortumi mittarfiliornissaq qimerluualaarneqaqqilersoq
Kujataani Qaqortumi mittarfiliornissamut pilersaarut suli nalorninartorsiorfiuvoq.
Suliniut maannamut appaassaa kinguartinneqareerpoq, suliariumannillutillu nalunaartut ilaannaalluunniit akigitinneqartumut neqeruunngillat.
* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
* Qaqortumi nunap immikkoortuani meterinik 1500-nik takissusilimmik mittarfiliortoqassaaq.
* Mittarfissat taakku pingasuusut 3,6 milliardit koruunit missaannik akeqassangatinneqarput.
Tusarfik: KNR
Qaqortumi mittarfissap 1500 meteriusup sananeqarnissaanut aningaasartuutit missingersuutaasunit amerlanerungaatsiartut maanna paasinarsivoq.
Naalakkersuisut tusagassiutinut nalunaarummi allapput.
Sunillu periarfissaqarsinnaanersoq maanna politikerit misissuissallutik aalajangerput.
Misissuinerup kingorna politikeri ilisimasaqarnerulernissaat siunertaasoq, Ineqarnermut, attaveqatigiinnermut, naligiissitaanermut naalakkersuisoq, Naaja Nathanielsen naasuiaavoq.
- Misissuinerni aalajangiisartut eqqortumik aalajangiinissamut sakkussaannik tunineqarnissaat naatsorsuutigaara, tusagassiuutinut nalunaarummi allappoq.
Inerneri takkutillattaassapput
Misissuineq naammassereerpat aatsaat qanoq iliortoqarsinnaanera naalakkersuisut paasiumaarpaat. Tamannalu Inatsisartu Kujataata kommunianilu aalajangiissutigineqarumaarpoq.
Suliat inerneri aggustimi saqqummiussuunneqalissasut naatsorsuutigineqarpoq.
- Inatsisartut, ataatsimiititaliat, kommunalbestyrelsi aamma inuit tamat akuutinneqarnissaat ingerlaavartumillu ilisimatinneqartarnissaat anguniagaraara, taamaalillunilu suliami aalajangiinissamut tunngavissat ammaffigineqarnissaat pilersinneqarluni, Naaja Nathanielsen oqarpoq.
AAMMA ATUARUK Qaqortumi mittarfissaq pillugu nalornineq
Siullermik suliariumannittussarsiuussinerup inerneranit allaanermik maanna inerneqanngitsoq tupaallannarujussuanngilaq. Aappassaanimmi suliariumannittussarsiuussinermi sinaakkutit allanngortinneqanngillat.
Siullermi suliariumannittussarsiuussisoqarmat suliffeqarfiit tallimat neqeroorput. Akigititaq 570 millionit koruuniuvoq – suliarimannillutillu neqeroortut tamarmik 1 milliardinik ikinnerunngitsunik neqeroorlutik.
Kalaallit Airportip suliariumannillutik neqeroortunut maajimi isumaqatigiissusiornissaat pilersaarutaagaluarpoq, taamaaliortoqanngilarli.
AAMMA ATUARUK Mittarfiliornissaq nalornissutigineqartoq: Akunnittarfiutilik Heidi ernumavoq
Tamanna kujataarmiunit pakatsissutigineqangaatsiarpoq. Naaja Nathanielsenilli naamammagittartoqarnissaanik kissaatigineqarpoq
- Utaqqineq kipiluttunartoorfiusinnaammat paasilluarpara, kisiannili qinnutigissavara naammagittarneq sivisunerulaartumik atorneqassasoq.
- Aalajangiinerup pinngitsoortinneqarnissaa siunnerfigineqanngilaq, kisiannili piaartumik eqqorluinnartumik aalajangiinissamut tunngavissaqarnissaq siunnerfigineqarluni.
