Qaqortumi mittarfissaq pillugu nalornineq

Kalaallit Airportsip Qaqortumi mittarfiliornissamut suliariumannittussarsiuussinermini missingersuutitut sinaakkutaata iluani neqeroortoqanngilaq. Tassalu mittarfiliornissamut pilersaarut nalorninartortaqaqqilerpoq.
Den første budrunde endte også uden et reelt bud i august sidste år. Fem selskaber havde givet et tilbud på hele projektet i Qaqortoq, som både er bygninger og landingsbane til 570 millioner kroner. Foto: KAIR
juunip 19-at 2021 11:17

Kalaallit Airportsip Qaqortumi mittarfiliornissamut aappassaanik suliariumannittussarsiuussigami missingersuutimut sinaakkutaata iluani neqeroortoqanngilaq. Tassalu Qaqortumi mittarfiliornissaq pillugu nalorninartoqaqqilerpoq.

AAMMA ATUARUK KAIR Nuummi qaartitsinerit annerit ilaannik qaartitsilersoq

Aappassaanik suliariumannittussarsiuussinermi suliarinnittussarsinatik pillugu Sermitsiaq.AG-p allataani paasissutissat Kalaallit Airportsip KNR-imut uppernarsarpai.

- Aap tamanna uppernarsarsinnaavara, aappassaannik suliariumanittussarsiuussisoqareersoq neqerooruteqartut akornanni aningaasartuutissatut missingiunneqartut iluanni ataatsimilluunniit neqerooruteqartoqarsimanngilaq, Kalaallit Airportsimit Hans Henrik H. de Lichtenberg KNR-imut allappoq.

Siullermik suliariumannittussarsiuussinerup inerneranit allaanermik maanna inerneqanngitsoq tupaallannarujussuanngilaq. Aappassaanimmi suliariumannittussarsiuussinermi sinaakkutik allanngortinneqanngillat.

- Qaqortumi pilersaarut pillugu suli aalajangiisoqanngilaq. Piginnittut suliariumannittussarsiuusseqqittoqarsinnaaneralu eqqarsaatigalugit annerusumik oqaaseqarsinnaanngilagut, Hans Henrik H. de Lichtenberg allappoq.

AAMMA ATUARUK KAIR: Piumasaqaatit nutaat 900 millionit koruuninnik immaqa naleqassapput

 

KNR-ip naalakersuisoq akisussaasuusoq Naaja Nathanielsen (IA) apersorusukkaluarpaa, tallimanngornerulli tulliata kingorna aatsaat oqaaseqarnissani kissaatigaa. Naalakkersuisut Qaqortumi mittarfik pillugu tassani nalunaaruteqarumaartut nalunaarpoq.

Qaqortumili mittarfiliortoqalissappat, arlaannik pisoqartariaqarpoq.

- Akikinnerusumik mittarfiliortoqassanersoq, imaluunniit sanaartornissamut aningaasatigut missingersuutit amerlineqassanersut takorloorneqarsinnaavoq, Hans Henrik H. de Lichtenberg oqarpoq.