Misissuititsisimanerup inerneri saqqummiukkumanngikkaat
Kikkut akiligassaqarsimappat? misissuititsisimanerup suna inernerivaa? naalakkersuisuni inatsisartunilu maanna ilaasortaasut nunatta karsianit akiliutsillutik aningaasaateqarfittut atorsimavaat?
Tamakkuupput novembarip qeqqaniilli apeqqutit kaaviaarsimasut nunatta karsianut Aleqa Hammonditut Kuupik Kleistitullu Naalakkersuisuusimasut akiligassaqarsimanersut kukkunersiuinermik ataatsimiitsitaliaasimasup misissuititsinerata inerneri inatsisartunut apuunneqarmata.
Tassani qinersinissamik nalunaarutiginnittoqareermat nalunaarusiaq bankimut toqqorsivimmut toqqorneqarput.
AAMMA ATUARUK Kukkunersiuinermut Ataatsimiititaliaq nutaaq bankboksip ammarnissaanut piareerpoq
Maannalu Inatsisartuni kukkunersiuinermik ataatsimiitsitaliaq ataatsinngormat pilersinneqarmata ippassaq suliassatut siullertut nalunaarusiami allassimasut suliarivaat.
Allassimasulli suli saqqummiunneqarsinnaanngillat Naalakkersuisut nalunaarusiamut isummernissaat peqqaartinnagu.
- Allakkat uku tigusagut apeqquterpassuarnik akissuteqarput, taamaakkaluartoq aamma apeqqutinik allanik pilersitsimmata taamaammat ingerlateqqippagut naalakkersuisunut, Kukkunersiuinermik Ataatsimiitsitaliami siulittaasoq Demokraatiniit inatsisartuni ilaasortaq Randi Vestergaard Evaldsen taama oqarpoq.
Nalunaarusiaq Naalakkersuisunit isummerfigitikkusukkaat
Taassuma oqaatigaa kukkunersiuinermik ataatsimiititaliami ilaasortaasut tamarmiullutik isumaqatigiillutik Naalakkersuisunut nalunaarusiaq isummertinnissaanut aalajangiiffigisimagaat.
Suut apeqqutit ilassutitut saqqummernersut, kikkullu maannakkut Naalakkersuisuni inatsisartunilu ilaasortat akiligassaqarnersut nalunaarusiami saqqummersimanersut oqaatigiumanngilaa:
- Tamakku iserfigissanngikkallarpakka. Naalakkersuisut akissutitik uterteriarunikku, akissutit tamakkua akiumaarpagut, Randi Vestergaard Evaldsen oqarpoq.
Naalakkersuisut kukkunersiuinermik ataatsimiitsitaliamiit piumaffigineqarput, januaarip arfernga tikitsinnagu akissuteqariissasut.
Taamaattumik Innutaasut ukiup nutaap aallartinnerata tungaanut nalunaarusiap qanoq imaqarnersoq paasinissaanut utaqqisinnaapput.
Maleruagassat malinneqartariaqartut
Inuttaasut utaqqisinneqarnerat nalunngikkaluarlugu ataatsimiitsitaliamit peqquteqavillutik utaqqisitsipput:
- Sooruna innuttaasut utaqqisippisigit?
- Ilisimavarput innuttaasut utaqqisut, aamma kissaatiginaraluaqaaq saqqummiunnissaat. Kisianni uku inatsisaasut aammalu maleruagassaasut malittariaqaratsigit, aamma ataatsimiitsitaliaminngaanniit malinnissaat pingaartikkatsigit. Kisianni ernumagissanngilarsi saqqummerumaarpoq, taanna oqarpoq.
Naalakkersuisuniillu isummerfigineqannginnerani ataatsimiitsitaliami nalunaarusiaq oqaluuseralugulu isummerfigineqarpoq, Randi Vestergaard Evaldsenilli Naalakkersuisut isummereertinnagit qanoq innersuussisoqarnersoq oqaatigisinnaannginnerarpaa.
- Oqaluttuussinnaanngilassi maannakkut, utaqqisariaqassaasi nalunaarusiap saqqummiunneqarnissaanut. Taavalu mianerisassanik ulikkaaratta, inunnut tunngassuteqartuugamik, inatsisillu ataatsimiitsitaliaminngaanniit malittariaqaratsigit, Kukkunersiuinermik Ataatsimiitsitaliami siulittaasoq Randi Vestergaard Evaldsen taama oqarpoq.
