Kukkunersiuinermut Ataatsimiititaliaq nutaaq bankboksip ammarnissaanut piareerpoq

Naalakkersuisunut ilaasortaasimasut kikkut Nunatta karsianut akiitsoqarnerinik isertugaatigineqartoq Grønlandsbankip toqqorsiviini sivisuumik paarineqarpoq.
Allattoq Dorthea Johansen
decembarip 16-at 2014 10:10
Nutserisoq Simon Uldum -

Kukkunersiusarfiup Deloittep arlaannaanulluunniit pituttorsimanngitsumik misissuinerata qinersineq sioqqullugu avammut saqqummiunneqarnissaa innuttaasorpassuit politikererpassuillu piumasarigaluarpaat, inatsisilli naapertorlugit taamaaliortoqarsinnaanngimmat aningaaseriviup boksianut toqqorneqarallarpoq.

 

Ataatsimiititaliap suliaasa siullersarissavaat

Kukkunersiuinermullu ataatsimiititaliaq nutaaq tallimanik ilaasortaqartoq, Randi Vestergaard Evaldsenimit (D) siulittaasuuffigineqartoq maanna pilersinneqarpoq. Boksillu ammarnissaanut piffissanngorpoq.

 

- Suliassat siulliit soorunami ilagissavaat allagaatit bankboksimiittut misissussallugit.

- Ataatsimiititaliaq ilaasortassaalu inissinneqaqqammerput. Qaqugu saqqummiunneqassanersoq oqaatigisinnaanngikkallarparput. Kisianni soorunami ilisimaarivarput inuiaqatigiinnit utaqqineqartoq, taamaammat soorunami siullersaatillugu suliarissavarput, Randi Vestergaard Evaldsen KNR-imut oqarpoq.

AAMMA ATUARUK Kukkunersiunermut ataatsimiititaliap nalunaarusiaa novembarip 28-ata kingorna saqqummiunneqassaaq

Naalakkersuisut siulittaasorisimasaata Aleqa Hammondip aningaasanik 106.363,27 koruuninik nunatta karsianit atornerluisimaneranut, siulittaasutut tunuarneranut aammalu qinersisitsisoqarneranik kinguneqartumut atatillugu nalunaarusiaq suliarineqarpoq.