Misissuinermi periuseq nutaaq: coronamik tunillatsissimanerit paasiniarlugu misissortinnissaq pisariaqanngilaq

Napparsimaguit imaluunniit coronamik ersiuteqaruit angerlarsimaannassaatit. Aatsaat napparsimarululeruit PCR-imik misissortissinnaavutit.
Napparsimmaviup napparsimasut isumaginissaat akiuussusersuinerlu ukkatariniarpai. Peqqinnissamut tunngassuteqartut allat aamma ammatinneqassapput. Peqqinnissamut naalakkersuisuugallartoq, Mimi Karlsen oqarpoq. Assi © : Nauja Møller / KNR
Allattoq Malik Brøns
januaarip 18-at 2022 10:27

- Illoqarfimmi tuniluuffiusumi najugaqaruit coronamillu ersiuteqarlutit taava tunillatsissimassaatit. Taamaammat antigentestimik (sukkasuumik misissuummik aaqq.) pisinissaq imaluunniit napparsimmavimmut misissortikkiartornissaq pisariaqanngilaq.

Nakorsaaneq, Henrik L. Hansen ataasinngornermi tusagassiortunik katersortitsinermi oqarpoq.

Misissuisarnermut periuseq nutaaq

Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:  

Tassa utoqqaat inuillu uummatikkut puatigullu nappaateqartut tunillatsissimanermillu ersiuteqartut misissortikkiartorsinnaapput. 

Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.

Tamanna misissuisarfiit napparsimmaviillu malinnaasinnaajunnaarnerannik pissuteqarpoq.

Neriniartarfiit imerniartarfiillu sapaatini akunnerni marlunni tulliuttuni unnukkut quliniit ullaakkut tallimat tungaanut matoqqasassapput.   

Allatut oqaatigalugu: Coronamik ersiuteqarnivit napparsimmavimmi uppernarsartinnissaa eqqarsaatigisariaqanngilaq. Virusimik tunillatsissimanerit ilimanarluinnarpoq, taamaammallu quersortit, kakkilertasutit niaqorluttutillu.

Illoqarfinni tuniluuffiusuni tuniluunneq siammasingaarmat misissuisarneq nalinginnaasoq atorunnaarpoq. Peqqinnissaqarfimmi malinnaasinnaajunnaarpoq.

Suna tamarmi allanngortoq

Tusagassiortunik katersortitsinermi oqariartuut naatsumik oqaatigalugu tassaavoq:

Napparsimaguit imminullu paarisinnaaguit taava angerlarsimaannarit. Sukkasuumik misissuutimit tunillatsissimanerit uppernarsarneqarpat PCR-imik misissortissinnaalernavianngilatit.

Napparsimarululersulli napparsimmavimmut attaveqassapput.

Napparsimmaviup napparsimasut isumaginissaat akiuussusersuinerlu ukkatariniarpai. Peqqinnissamut tunngassuteqartut allat aamma ammatinneqassapput.

Peqqinnissamut naalakkersuisuugallartoq, Mimi Karlsen (IA) oqarpoq.

- Ersiuteqartut tamarmik angerlarsimaannarnissaat kaammattuutigaarput. Siusinnerusukkut akunnerit arlallit misissortinniarluni siuleriaattoqartarpoq. Maanna angerlarsimaannartoqassaaq. Isumalluutit amerlanerusut misissugassamik tigusisunut misissueeqissaarnermullu atorneqartut akiuussusersuinermi aamma isumalluutigaagut.

- Suliniutigut tamaasa unitsinngilagut, sunali tamarmi allanngortoq nassuerutigaarput. Taamaammallu uagut aamma allanngortariaqarpugut. Nappaalaneq pitsaanerpaamik qaangissagutsigu atorluarsinnaasatsinnik – assersuutigalugu akiuussutissanik atorluaanissarput pisariaqarpoq.

Tunillatsissimasut boosterimik kapitinnissamut sapaatini akunnerni sisamani utaqqissasut

Peqqinnissaqarfiup akiuussutissaq sakkortusaataasoq ulluni makkunani neqeroorutigaa. Kisianni aamma tunillatsissimasorpassuaqarpoq, taamaammat tunillatsissimasut akiuussuserneqarsinnaanngikkallarput.

Nakorsaanerup pingajussaanik akiuussutissamik kapitinnissaq tunillatsissinnermit sivikinnerpaamik sapaatini akunnerni sisamani utaqqeqqaartoqarnissaa nassuiaatigaa. Taassuma kikkut tamarmik aamma tunillatsereersimasut boosterimik akiuussuserneqarnissaat innersuussutigaa.

- Tunillatsissimasut tamarmik boosterimik aamma akiuussuserneqarnissaat innersuussutaavoq. Maanna tuniluuttoqarnerata piffissap sivikitsup ingerlanerani qaangiunnissaa naatsorsuutigaarput. Kisianni piffissamut sivisuumut illersornissarput maanna eqqarsaatigileriissavarput, Henrik L. Hansen oqarpoq.