Misissuineq nutaaq: Utoqqaat kiserliortut
Nunatsinni utoqqaat atugaat pillugit siullerpaamik misissuisoqaqqammerpoq.
- Utoqqaat atugaasa suleqatigiinnikkut ilisimasanillu najoqqutaqarnerunikkut pitsanngorsarneqarnissaat misissuinermi siunertarinqartoq ilisimatuup Christina Viskum Lytken Larsenip ilisimatuut tallimat allat Københavns Universitetimeersut, Ilisimatusarfimmeersut, Ilisimatusarfimmeersut Syddansk Universitetimeersullu peqatigalugit misissueqataasup oqaatigaa.
Utoqqaat ulluinnarni nammineersinnaassusaat, nappaataat atugarisaallu misissuinermi ukkatarineqarput.
- Utoqqaat atugaasa pitsanngorsaavigineqarnissaat pingaaruteqartorujussuuvoq, taamaammat kommunini suliatigut susassareqatigiit suleqatigilluarnissaat aamma pingaaruteqarpoq, Christina Viskum Lytken Larsen oqarpoq.
Kiserliornerup misissuinermut atatillugu nalunaarusiami immikkut taaneqarnera immikkut maluginiagassaavoq. Nunaqarfinni utoqqaat (28 procentii) illoqarfinnilu utoqqaat (13 procentii) kiserliortuusut nalunaarusiami atuarneqarsinnaavoq.
Tarnimikkut sanngiinnerit kiserliornerusartut
Qaqortormiu 74-inik ukiulik Cecilie Løvstrøm utoqqaat ineqarfiini ineqarpoq, taassumalu utoqqarnik kiserliortoqarneraanera isumaqatigai:
- Ilumoorpoq taanna. Utoqqaat illuaniittut ilaat ornikulaneqanngeqaat ilaatigut. Malugisinnaasarpara, takusinnaasarpara aamma isituaraangama. Ilaat ilaqutaasa ornittarsimanngilaat, Cecilie Løvstrøm oqarpoq.
- Qatanngutigiippaaluit maaniippugut arfiniliulluta. Kisianni immitsinnut takorpiarneq ajorpugut.
Inuit tarnimikkut sanngiinnerusut timimikkullu piginnaasakinnerusut kiserliornerusartut misissuinerup takutippaa.
- Utoqqaliartornermi ulluinnarni nammineersinnaaneq annikilliartortarpoq. Tamannalu kiserliornermut attuumassuteqartorujussuuvoq, Christina Viskum Lytken Larsen oqarpoq. Utoqqaalli utoqqaat peqatigiiffiini, timersoqatigiiffinni taakkununngalu assingusunik sammisassaqartitsiviusartuni peqataasartut aamma amerlapput. Cecilie Løvstrømilu taakku ilagaat:
- Binkoklubbi annerusumik ornittarpara bankooqqallu aliikkusiarfigalugit. Uanga aliikkusiartuaannartarpunga sianerfigitittuartarama.
Ilisimatuup Christina Viskum Lytken Larsenip neriuutigaa, misissuinermi paasisat politikerinit utoqqarnillu sullissisunit aammalumi inuiaqatigiinnit atorneqarluarsinnaajumaartut:
- Utoqqaat piginnaasarpassuaqarput. Utoqqaat atukkaminnik pitsanngorsaaqataarusuttut amerlaqaat, piumassusilippassuillu utoqqarnik sullissisarput utoqqarnillu sullissisartuupput, Christina Viskum Lytken Larsen oqarpoq.
