Nuummi mittarfittaarsuaq tamakkiisumik atorneqalerpat, atlantikorsuaq qulaallugu silaannakkut angallassissutit angisoorsuit mittalerpata unnuisarfiit amerlanerit pisariaqartinneqalissapput. Visit Greenlandip Visit Nuuk’llu misissuinerisa tamanna takutippaat. 

Nunatta illoqarfiisa pingaarnersaanni unnuisarfiit septembarimi 2027-imi amigaatigineqalereersimanissaat misissuinermi eqqoriarneqarpoq.

Paarlattuanilli takornariat amerligaluarpataluunniit misigisassarsiorfiusinnaasut naammassasut, illoqarfimmilu susassaqartitsinermut iluaqutaassasut, ilimanarsereertoq ilanngullugu oqaatigineqarpoq.

Takornariat amerlanerulernissaat iluaqutigineruniaraanni unnuisarfiit taamaammat amerlisarneqarnissaat pisariaqarluinnartoq oqaatigineqarportaaq.

Unnuisarfiit illoqarfimmi maanna piusut 1.000-upput, hotelini, inissiani hotelitut pilersitani aamma vandrerhjemitut ittuni iniullutik. Taakku saniatigut kangerlunni  takornarianut tammaarsimaarfinni illuaqqanilu unnuisarfiit 300-pput.

Misissuinermi takornariat siunissami tikittartussat qanoq amerlatiginissaannik taasami unnuisarfiit taamaammat naammaqqajanngillat. Soorlu aamma neriniartarfiit naammannavianngitsut. Angallannerpaaffiummi nalaani neriniartarfiit amigassapput.

Mittarfiit ammarnissaat kinguartinneqartuartut

Nuummi nunat tamalaat mittarfissarsuat qangali utaqqisaavoq, naammassinissaatalu ullua allanngortuarsimariarluni maanna novembarip ulluisa 28-anni naammassivittussatut nalunaarutigineqartoq, Greenland Airportsip pisortaata Jens R. Lauridsenip juunip aallartinnerani neriorsuutigaa.

Greenland Airportsili allannguummik kingumut nalunaaruteqarpoq, tamatumuuma illorsuup tikittunut aallariartortunullu atugassap terminalip atulernissaa una sapaatit akunnera pisussaagaluartoq kingusinnerusumut nuutsittariaqartoq allaaserimmagu. Angallannermut Aqutsisoqarfiup terminalimi isumannaallisaavik akuerigaluaraa, qatserinermut upalungaarsimasut ataasiakkaanik aaqqitassanik nalunaarsuisimanerat pissutigalugu kinguartitsisoqarpoq.

Timmisartumut ilaasussat terminali nutaaq atorlugu juunip 17-ianit tunniussisinnaalernissaat mittarfitoqqamiillu aallartarnissaat pilersaarutaagaluarpoq, tamannali ataasinngorneq juunip 24-anut kinguartinneqarpoq.

Mittarfissuup pisortatigoortumik ammarnissaa kinguartinneqartaraluartoq, pinngitsoorani novembarip ulluisa 28-anni atlantikoq qulaallugu timmisartorsuup siulliup minnissaa ulloq taanna pissasoq Greenland AIrportsip allakatigut avisimut Sermitsiamut nalunaarutigaa. Nutaarsiassaqartitsivik taama marlunngornermi nalunaarpoq.

Ilulissani atlantikoq qulaallugu silaannakkut angalasunut mittarfissarsuup naammassiniarnera aamma kinguaattoorfiuvoq. 2026-ip naalernerani aatsaat naammassinissaa maanna ilimagineqarpoq.