Greenland Travelip nunarput takornariaqangaatsiassangatikkaa
Nuummi Ilulissanilu mittarfissuartaassat ukioq ataaseq sinnerlugu qaangiuppat aatsaat atulertussaagaluartut piareersaatit aallartisarneqalereersut Greenland Travelip pisortaanera Peter Bastrup oqaluttuarpoq.
- Mittarfissuartaassat marluk pilersaarutit malillugit ammarpata allannguutissat soorunami piareersaateqarfigilereerpavut. Nunarput tikikkuminarnerulertussaavoq, nunatsinnukartartullu maannaminngarnit amerlanerulertussaapput, taanna oqarpoq.
Naallu mittarfissuartaassat atulernissaat 2024-p naalerneranut kinguaraluartoq nunanit allanit toqqaannartumik Nuummut Ilulissanullu tikerarluartoqartalernissaa ilimagineqarmat piareersaatit ingerlatiinnarneqarput.
Nuuk takornariaqarfissuanngorsinnaasoq
Pingaartumik Nuuk takornarianit tikikkusunneqartassasoq Peter Bastrupip ilimagaa. Taamaattumillu takornariat nunatsinnut pingaartumillu illoqarfiit pingaarnersannut tikittalernissaannut piareersangaatsiafiupput.
- Nuuk 2025-mi takornariartussanut pilerinarnerulersikkumallugu sivisunerusumik illoqarfimmiinnissaannut tulluarsaalluta piareersaateqalaalereerpugut.
Mittarfissuartaarnerli takornariaqarnerulernissaanik isumaqaannarani aammali takornariat sivisunerusumik illoqarfimmiikkusuttassasut Peter Bastrupip ilimagaa:
- Nuummi takornariaqarnerulernissaa aammali takornariat sivisunerulaamik Nuummiikkusuttarnissaat ilimagaarput. Taamaattumik nunatsinnut siunissami takornariartussanut neqeroorutigisassagut tulluarsalereerpagut, taanna oqarpoq.
Nunatsinni takornarialerisut pilerisaarinissaminnut piareersimasut
Nuuk siunissami feeriarfissuanngortinniarlugu Greenland Travel kisimi piareersaateqanngitsoq Peter Bastrup oqarpoq:
- Nuummi mittarfissuassap ammarnissaata qanilliartornera ilutigalugu takornarialerisut tikittussanut neqerooruusiassaminnik piareersaasut amerligaluttuinnarput. Nuummi misigineqarsinnaasut amerlinikooqaat, ukiummi siuliini taamaanngikkaluarpoq, taanna oqarpoq nangillunilu:
- Angallammik angalaarluni aamma ullup ingerlanerani misigineqarsinnaasunik periarfissat siornatigornit amerlanerulernikuupput. Taamaammat takornariat sivisunerusumik Nuummiinnissinnaassapput.
