- Utertuusinerit ersinerit, immaqa aninissamut ersinerit. Naatsumik oqaatigalugu taakku meeqqat inuusuttullu nalinginnaasumik inuuniarnerminnik immaqaluunniit inuuniarnermikkut ajornartorsiortorujussuanngorsinnaapput innarliisimasut naapittarneraninngaaniit.Assi: KNR

MIO pineqaatissinneqarnissaminnut utaqqisut pillugit: Annilaarnaqaaq

Meeqqanut kinguaassiutitigut pinerluuteqarsimasut inuiaqatigiit akornanneerujoorlutik pinerluuteqarsimasunut inissiisarfimmut utaqqisut arlaqarput. Tamanna iliuuseqarfigineqartariaqartoq meeqqat illersuisuat isumaqarpoq.

- Ernumanaannarani aamma akuerineqarsinnaanngitsutut isigivara.

Meeqqat illersuisuat, Aviaja Egede Lynge taama ersaritsigisumik oqariartuuteqarpoq.

Taanna nutaarsiassamut, KNR-imii sapaatit akunnerata siuliani saqqummiussarput nunatsinni inuit 64-it kinguaassiutitigut pinerluuteqarsimasutut ilaatigut pinerluuteqarsimasunut inissiisarfimmut utaqqisuniittut, pillugit taama oqaaseqarpoq. Taakkunannga 15-it meeqqat 15-it inorlugit ukiulinnut kannguttaatsuliorsimapput.

AAMMA ATUARUK Kinguaassiutitigut pinerluuteqarsimasut inissiisarfimmiilernissaminnut inuiaqatigiinni akuusartut

Taakku pineqaatissinneqarnissaminnut utaqqinerminni inuiaqatigiit killilersorneqaratik akornanniipput. Kannguttaatsuliorfigineqarsimasut kannguttaatsuliortortik taamaalillutik naapeqqissinnaasarpaat.

Pinerluttunik Isumaginnittoqarfimmi utaqqisut

 

Nunatsinni pineqaatissinneqarsimasut illoqarfinni qulingiluani nunaqarfinnilu sisamani pineqaatissinneqarsimasut inissiisarfimmiilernissaminnut utaqqisoqarpoq.

 

Taakkunannga:

  • 25-t kinguaassiutitigut pinerluuteqarsimapput (taakkunannga 15-it meeqqanut 15-it inorlugit ukiulinnut pinerluuteqartuullutik)
  • 21-t nakuusernermut atatillugu eqqartuussaasimapput
  • 13-it  aanngajjarniutinut inatsisit pillugit eqqartuussaasimapput
  • 5-it tillinnermut, pisuttorniarluni pinerluuteqarnermut assingusumullu atatillugu eqqartuussaasimapput.

- Uku meeqqat taamatut aqqusaagaqarsimasut annertuumik inuunerminni timikkut tarnikkullu innarlerneqareersimasuupput. Taamaammat innarliisimasut taakkua ulluinnarni naapittarneranni meeqqat taakkua qaavatigut aamma innarlerneqaqqissinnaammata.

- Tassa una eqqarsaatigalugu utertuusinerit ersinerit, immaqa aninissamut ersinerit. Naatsumik oqaatigalugu taakku meeqqat inuusuttullu nalinginnaasumik inuuniarnerminnik immaqaluunniit inuuniarnermikkut ajornartorsiortorujussuanngorsinnaapput innarliisimasut naapittarneraninngaanniit.

Inissat tamakkerlutik atorneqartut  

Nunatsinni pinerlusimasunut inissiisarfiit ulikkaaqqajuarnerat peqqutigalugu, pineqaatissinneqartussat utaqqisuniitinneqartariaqartarput.

- Nunatsinni pinerluttunik isumaginnittoqarfimmi inissaqartitsinerput killeqarpoq, taamaammat utaqqisunut allattorsimaffeqarpugut. Nunatsinni pinerluttunik isumaginnittoqarfiup pisortaa, Naaja Nathanielsen sapaatit akunerata siuliani oqarpoq.

Nunarput tamakkerlugu inuit 154-it pinerluuteqarsimasunut inissiisarfimmi inissaqartinneqarput, pinerluttunillu isumaginnittoqarfiup kikkut inissiisarfimmiileqqaassanersut pingaarnersiortartut, taanna nassuiaavoq.

Naallu kinguaassiutitigut pinerluuteqarsimasut nunatsinni eqqartuussiveqarfinniit siulliunneqartaraluartut, pineqaatissinneqarnissaminnut ilaatigut ukiup ataatsip missaani utaqqisariaqartarput.

Naalakkersuisoq: sulilereerpugut

MIO-mit aperigaanni, meeqqat kinguaassiutitigut kannguttaatsuliorfineqarsimasut illersorneqarnerunissaat nunatsinni tamanit piumasarineqarpoq. Taamaammat kanngutsaatsuliorsimasut aqqusiniinnarmi takussaasarnerat iliuuseqarfigineqartariaqartoq MIO oqariartuuteqarpoq.

- Meeqqat kannguttaatsuliorfigineqarsimasut, taama iliorsimasut naapittartussaanngilaat. Taamaammat parnaarussivimmut inissinneqarnissaminnut utaqqisut isumaqarpunga meeqqaanut tunngatillugu siulliunneqartariaqartut, Aviaja Egede Lynge oqarpoq.

Tassunga tunngatillugu isumaginninnermut naalakkersuisoq, Martha Abelsen apersorusussimagaluarparput iluatsinngilarpulli, kisianni mailikut ima akissuteqarpoq:

- Nunatsinni eqqartuussiveqarfiit kinguaassiutitigut atornerluisimasut siulliuttarmatigit nuannaarutigaara. Tamanna ajortuliortup aqqusinermi naapittannginnissaa eqarsaatigalugu, pineqaatissinneqartunut, pingaartumillu kanngutsaatsuliorfigineqarsimasunut pingaaruteqarpoq. Kinguaassiutitigut pinerluuteqarsimasut piaarnerpaamik pineqaatissinneqartarnissaat kissaatigiuaannarparput anguniartuaannassavarpullu.

AAMMA ATUARUK Martha Abelsen: Qaninniartarnerit imaluunniit kanngunarsaanerit suulluunniit akuerineqassanngillat

Aamma sulisunik Danmarkimeersunit ikiorserneqarneq taavalu aningaasarsiat sulinermilu atukkat pitsanngorsarnerat pinerluttunik isumaginnittoqarfiup tatineqarneranit ikiorsiissutaasinnaasut, Martha Abelsenip innersuussutigaa.

Taava aamma Danmarkimi inatsisilerinermut ministereqarfik ikorfartuisinnaasoq eqqaavaa. 

- Amerlanerusut eqqartuussaasalerpata, pineqaatissinneqarsimasunut inissiisarfinni qanoq iliornikkut amerlanerusunik inissaqalersinnaanersoq, peqqarniitsumik pinerluuteqarsimasunut pineqaatissiissutit sukannernerulersinneqarsinnaanerannik, inatsisilerinermut ministerimut saaffiginnissutitsinnut atatillugu ilanngullugu misissugassaavoq. Suliarlu taanna inatsisilerinermut ministereqarfimmi suliarineqalereerpoq, Martha Abelsen oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat