Martha Abelsen: Qaninniartarnerit imaluunniit kanngunarsaanerit suulluunniit akuerineqassanngillat

Suleqatinut qaninniartarnerit imaluunniit kanngunarsaanerit suulluunniit akuerineqassanngillat.

Peqqissutsimut, Isumaginninnermut Inatsisinillu Atuutsitsinermut naalakkersuisoq Martha Abelsen taama ersaritsigisumik oqariartuuteqarpoq.

- Inuiaqatigiinni inissaqartariaqanngillat – aamma nuannataarnerni imaluunniit suleqatit akornanni ”quiasaarutigalugu” inissaqartariaqanngillat. Tamanna – naligiissitaanermut Naalakkersuisutut – kimulluunniit naqissuserusuppara,

Martha Abelsen tusagassiutinut nalunaarummini taama allappoq.

Arnat qulit Mikael Petersenimit kinguaassiutitigut innimiilliorneqarsimanertik februari naalersoq saqqummiuppaat.

AAMMA ATUARUK Nittartakkatigut tusagassiorfik: Arnat qulit Siumumit Mikael Petersen innimiilliorsimaneraraat

Martha Abelsenip ajuusaarutigalugu oqaatigaa nammineq partiimini Siumumi arnat kanngunarsarneqartutut misigisimammata.

- Parteerput iliuuseqapallappoq, tamannalu iluarisimaarsinnaavarput. Kinguaassiutitigut naapertuilluanngitsuliornerit oqitsutut tigunngisaannartariaqarpagut.

Innimiilliornermut killissaq nalunanngilaq

Arnat qulit saqqummereersullu qisuariartut assigiinngillat. Partiini siulittaasut aamma assigiinngitsunik qisuariarput.

Kannguttaatsuliorneq eqqarsaatigalugu killissaq sumiinnersoq nalunarsinnaasoq, Atassummi siulittaasoq Aqqalu Jerimiassen Sermitsiaq.ag-imut oqarpoq.

- Ilaatigut suleqatit nuannisaqatigalugit kinguaassiuutitigut innimiilliorsinnaaneq qanittuaraasarpoq, Aqqalu Jerimiassen Sermitsiaq.ag-imut oqarpoq.

Tamanna Martha Abelsenip isumaqatiginngilluinnarpaa.

AAMMA ATUARUK Kim Kielsen: Kannguttaatsuliornerit akuerissanngilagut

- Kinguaassiutitigut innimiilliornermut killissaq ersarilluinnarpoq. Killissaq tassaavoq, iliuutsit oqaatsillu tigusisumit kissaatigineqanngippata. Imaluunniit eqqugaasumut iluaatsumik, kanngunartumik imaluunniit nakkarsaalluni iliuuseqarneq anguniarneqarpat, taanna oqarpoq.

- Taamaattumik aliasuutigaara takusinnaallugu inuiaqatigiinni ilarpassuatta kanngusaarinerit tamakku unitsinnissaat ersigigaat.

Taakkununngalu naalakkersuisoq oqariartuuteqarpoq:

- Taamaattumik kanngunarsaasup qisuariaatissaa ersigalugu qunussanngilagut. Matumani - Naalakkersuisutuinnaanngitsoq – aammali kalaallini inuiaqatigiinni innuttaasutut innuttaaqatinnut innersuussutigissavara, kanngunarsaanerit suulluunniit naammagiinnarlugit atorneqassanngitsut.