Kim Kielsen: Kannguttaatsuliornerit akuerissanngilagut
Arnat politikerit arlallit, Siumumi Inatsisartunilu kannguttaatsuliorfigineqarsimallutik oqaluttuaraat. Tamatuma kingunerisaanik, Siumumi siulittaasoq allakkatigut qisuariarpoq.
- Aallarniutigalugu erseqqissarumavara, kannguttaatsuliornerit suulluunniit akuerineqaratillu qaqugumulluunniit akuerineqanngisaannartussaammata, Siumumi siulittaasoq, Kim Kielsen tusagassiuutitigut pingasunngornermi taama nalunaaruteqarpoq.
Siumumi Naalakkersuisunilu siulittaasoq, Kim Kielsen KNR-imit ullut arlerlugit oqaaseqatinniarneqaraluarpoq, pisulli pillugit oqaaseqarumanani, mannali allakkatigut nalunaaruteqarpoq.
Suliaq aallartippoq, Siumumi arnat qulit, ilaatigut Aki-Matilda Høegh-Dam aamma Paninnguaq Heilmann, Siumumi allattaasimasumit, Mikael Petersenimit kannguttaatsuliorfigineqarsimanertik pillugu maalaaruteqarmata.
Ajornartorsiutit malunnik tunngassuteqartut
Partimili allattaasimasoq, Mikael Petersen pillugu oqaaseqarumanngilaq, inuillu ataasiakkaat pillugit aamma oqaaseqarsinnaannginnerarluni, Kim Kielsen erseqqissaavoq.
Arnat pineqartut oqaluttuaat ajornartorsiutinik assigiinngitsunik marlunnik tunngassuteqartut, Kim Kielsen oqarpoq.
AAMMA ATUARUK Inuit Ataqatigiit innimiilliortoqarsimanera nassuerutigigaat
- Oqaatigineqartup immikkoortua siulleq suliffeqarfiusumi timikkut kinguaassiutitigut kannguttaatsuliornermut tunngatinneqarpoq. Kannguttaatsuliornerit taakkua politinut eqqartuussivinnullu tunngasuupput, taamaattumik aammaarlunga inassutigissavara, pineqartut politiinut nalunaarutigalugit suliassanngortissagaat, inatsisit pioreersut naapertorlugit suliarineqarniassammata, siulittaaasoq, tusagassiuutitigut taama nalunaarummi oqarpoq.
Siulittaasoq naapertorlugu aappaattut oqaaserineqarsimasut kinguaassiutitigullu pissusilersorluni qaangiisimanermut tungasuupput.
- Taamatut pisoqartillugu nammineq killiliisinnaassalluni pingaaruteqarpoq. Kikkut tamarmik paasisariaqaraat pingaaruteqarpoq, kinaluunniit killileeqqusaammat, tamannalu tamanut pisinnaatitaaffiummat, aamma tamanit ataqqineqartussaammat. Tamatumani apeqqutaanngilaq amerlanerussuteqartut oqaaserineqartunut pissusermulluunniit akuersaarpata.
Siulittaasup aamma kaammattuutigaa, partiini politiikerit atorfilittallu ataatsimoorlutik akisussaaffilimmik pissusilersussasut, imminnullu ataqqeqatigiissasut.
AAMMA ATUARUK Arnani politikkimik suliaqartunut oqaaserineqartartut: Nulupajui!
- Akisussaaffik arnanut angutinulluunnit ataasiakkaanut inissiinnarsinnaanngilarput. Akisussaaffik tamatta tigummivarput, inoqativut ilagitillugit, Kim Kielsen taama allappoq.
Unngersap ataanittut pillugit oqaloqatigiittoqartartoq
Arnat KNR-ip oqaloqatigisimasaasa atertik saqqummersikkusunngilaat, Inatsisartulli isersimaartarfianni ”unngersap ataanittut” pillugit oqaloqatigiittoqangaatsiartartoq arnanillu nikanarsaarerpaluttumik quisaaruteqartoqartarnera nassuiaatigaat.
Taakku arnatut politikeritut atorfilittulluunniit isikkoq, aappariinneq piginnaasalluunniit pillugit oqaaseqartunik tusagaqarnianngikkunik qanoq ersaritsigisumik oqartariaqartarnerat oqaluttuaraat – tassa arnat angutit akornanni akissuteqaraangamik suiaassusermilluunniit aallaaveqartumik oqaaseqartoqaqqusinngikkaangamik qanoq asissugaasartiginerat imaluunniit inussiarniippaluttumik ilassineqartalertarnerat oqaatigaat.
Inuttut killiliinissamut ersissuteqartut siulittaasup aamma eqqarsaatigai.
AAMMA ATUARUK Nikanarsagaallutik tiingaffigineqartut: Nipangersimaannarasi kisimiinngilasi
- Maluginiarpara oqaluttuarineqartut ilagimmassuk, pineqartut ersiorlutik killiliisimasinnaasimanatik, illutungaanilu pisuusaartariaqarsimallutik oqaaserineqartut tissigisuusaarlugit.
Taamatut pineqarsimammata tamanna alianarpoq akuerineqarsinnaanngilarlu, kisianni ajuusaarnaraluartumik paasinnilluarpunga arnat pineqartut taamatut qisuariartariaqarsimammata, Siumumi siulittaasoq taama tunngavilersuivoq nangillunilu:
Arnat pineqartut kisimiissimapput namminerlu pisumi qanoq iliuuseqartariaqarsimallutik. Ajoraluartumik tamanna takutippaa, qanoq ajornakusoortigisinnaasoq allanut paasisimasaqanngitsunullu akulerutissalluni, inuup killigititassai imaluunniit oqaaserineqartut pissuserlu qaangerneqarsimatillugit. Taamaattumik pisussaaffigalugu pingaaruteqarpoq, inuup namminerisamik killiliisinnaanissaanut tamatta akuersaaqataasariaqartugut, ataqqinnittariaqartugullu, Siumumi siulittaasoq taama allaaserisaqarpoq.
