Inuit Ataqatigiit innimiilliortoqarsimanera nassuerutigigaat
Inuit Ataqatigiinni partiimi ilaasortamut kinguaassiutitigut aamma innimiilliortoqarnikuuvoq.
Inuit Ataqatigiit siulersuisuunerani siulittaasup tulliata, Agathe Fontainip KNR-imut tamanna paasissutissiissutigaa.
Suliaq partiimi allami ilaasortap Inuit Ataqatigiinnit politikerimut oqaatsitigut kinguaassiutitigut innimiilliorneranut tunngavoq, tamannalu Inatsisartuni Siulittaasoqarfianut unnerluutigininneqarluni.
AAMMA ATUARUK Arnani politikkimik suliaqartunut oqaaserineqartartut: Nulupajui!
Agathe Fontainilli pisoq unnerluutiginninnerlu qanga pisimanersoq kinalu taama pineqarsimanersoq paaissutissiissutigerusunngilaa. KNR-imulli oqarluni:
- Qaangiiffigitissimalluni nalaataqarsimagaanni nalunngilarput Inatsisartuni ilaasortat sumut saaffiginnittartut, tassa siulittaasoqarfimmut. Qanoq pineqarsinnaaneq saaffiginnittarneq taanna misilittagaqarfigivarput.
Taassuma kinguaassiutitigut innimiilliornerit politikkikkut allamiluunniit pisarnerat Inuit Ataqatigiinni akuerineqarsinnaanngilluinnartut erseqqissumik oqaatigaa, tassungalu tunngatillugu malittarisassaqarnerarlugu.
- Pissutsit makkua (kinguaassiutitigut innimiilliornerit aaqq.) akuerineqarsinnaanngillat, taamaattumik kikkut tamarmik nalussanngilaat killeq sumiittoq, maleruagassallu qanoq ittuunersut, Agathe Fontain oqarpoq.
Demokraatit kinguaassiutitigut innimiilliortoqarsimannginneraraat
Demokraatit siulittaasorigallagaata, Nivi Olsenip partiimini kinguaassiutitigut innimiilliortoqarnikuunnginnerarpaa.
- Taamaattoqanngilaq. Tamanna 100 procentimik qulakkeerlugu oqaatigisinnaavara. Demokraatiniinninni kinguaassiutitigut innimiilliortoqarnikuunngilaq, Nivi Olsen oqarpoq.
Nivi Olsenip politikikkut allaniluunniit kinguaassiutitigut innimiilliornerit akuerineqarsinnaanngilluinnarnerarpai.
- Kinguaassiutitigut innimiilliortoqartarnera pillugu oqaatigineqartut akuerinngilluinnarpagut. Arnanut taama pissusilersuuteqartarnerit akuerineqarsinnaanngillat.
AAMMA ATUARUK Nikanarsagaallutik tiingaffigineqartut: Nipangersimaannarasi kisimiinngilasi
Taassuma arnat politikkut suliaqarnermi kinguaassiutitigut innimiilliorfigineqarsimanerminnik piffissami kingullermi saqqummiussisut taperserpai. Taamaakkaluartorli tamanna nammineq ilisarisinnaanngilaa.
- Tamanna uagut partiitsinni partiilluunniit paarlersuaanni maluginiarneq ajorpara.
Taassuma kinguaassiutitigut innimiilliortoqartarnerata ukkatarineqangaatsiarnera pissutigalugu arnat ilaat politikkikkut suliaqarniarunnaarnissaanik kinguneqarsinnaasoraa. Tamannalu uggornassasoq, Nivi Olsen oqarpoq.
- Politikkikkut suliaqarnissap navianartuunnginnerata siunissamut takutinnissaa pingaaruteqarpoq.
Parti Naleraq nutaanik malittarisassiortoq
Partii Naleqqap siulittaasuata kinguaassiutitigut innimiilliornerup oqallisaanera tupaallaatiginngilaa.
Taassuma nammineq partiimini taama pisoqarnikuusimannginnerarpaa, Inatsisartunili ileqquusut, ilaasortat ilaasa ikasartarnerat – paasinerlunneqarsinnaasoq ilisarisinnaanerarlugu.
- Tassami taamatut naliliisarnerit tupinnarpallaarunanngillat aamma immaqa ilaatigut ikasarlutik pissusilersortut taamatut nivinngarneqartarput. Politikeriinnaagunanngillat, aamma politikerit kisimik pisuutinniarneqarsinnaanngillat, Hans Enoksen oqarpoq.
AAMMA ATUARUK MIO kinguaassiutitigut inniminniilliornerit pillugit: Siumumit arnat saqqummernerat meeqqanut pingaaruteqarpoq
Partii Naleqqalli pissusilersuutinut taakkununnga malittarisassani ersarissarpai.
- Tassa taamatut nalaataqannginnissarput pillugu malittarisassamik sukaterinikuuvugut, taakkulu ingerlaannartumik akuliuffigineqartassapput, aammalu partiini allani soorlu takussaavallaarunanngitsut malittarisassat tamakkununnga tunngasut, Hans Enoksen oqarpoq.
